«Áleýmettik jelilerdegi Air Astana jáne FlyArystan avıakompanııalarynyń Almaty – Male, Nur-Sultan – Tashkent jáne Almaty – Qostanaı reısteri, sondaı-aq basqa da baǵyttardyń keshigý faktilerine qatysty jolaýshylardyń kóptegen shaǵym-ótinishterine baılanysty QR IIDM Azamattyq avıasııa komıteti jáne Qazaqstannyń avıasııalyq ákimshiligi tıisti tergeý júrgizetin bolady.
Reıster keshiktirilgen nemese oryndalmaǵan kezde jolaýshylardyń quqyqtaryn buzý faktileri bolǵany anyqtalǵan jaǵdaıda avıakompanııalar ákimshilik jaýapkershilikke tartylady», delingen Azamattyq avıasııa komıtetiniń habarlamasynda.
«Sonymen qatar tasymaldaýshynyń kinásinen reıs kidirgen nemese oryndalmaǵan jaǵdaıda qoldanystaǵy zańnamaǵa sáıkes, jolaýshylarǵa tegin negizde ana men bala bólmesi, reısti 2 saǵat kútken kezde salqyn sýsyndar, 4 saǵat kútken kezde ystyq tamaq (budan ári kúndizgi ýaqytta árbir 6 saǵat jáne túngi ýaqytta 8 saǵat), sondaı-aq reısti keri qaıtarǵan kezde ystyq tamaq beriledi. Sondaı-aq kúndizgi ýaqytta 8 saǵattan artyq jáne túngi ýaqytta 6 saǵattan artyq reısti kútken kezde qonaq úıde turý, turatyn jerine deıin jáne áýejaıǵa aparatyn kólik beriledi», dep naqtylady Azamattyq avıasııa komıtetinen.
