ÖZINŞE dep atalatyn onlaın kınoteatrda ártúrli jastaǵy balalarǵa arnalǵan tolyqmetrajdy anımasııalyq jáne kórkem fılmder, komıkster, mýlthıkaıalar, teleserıaldar men sıtkomdar toptasqan.
Jobanyń tusaýkeserine QR Aqparat jáne qoǵamdyq damý mınıstri Asqar Omarov qatysyp, platforma jumysyna qoldaý bildiretinin jetkizdi.
Sonymen qatar sharaǵa qatysqan Halyqaralyq Túrki akademııasynyń prezıdenti, «Egemen Qazaqstan» JShS Bas dırektory Darhan Qydyráli, Májilis depýtaty Juldyz Súleımenova, «Otandastar» qorynyń tóraǵasy Abzal Saparbekuly, «AMANAT» partııasynyń hatshysy Dáýlet Káribek, Prezıdent janyndaǵy Jastar keńesiniń múshesi Oljas Súleımenov quttyqtaý lebizderinde balalarǵa arnalǵan mundaı qosymshanyń ózektiligin aıtyp, jumysyna sáttilik tiledi.
Budan bólek, tusaýkeserge Májilis depýtaty Eldos Abaqanov, «Rýhanı jańǵyrý» QQDI Basqarma tóraǵasynyń orynbasary Amanbek Tólepbergenov, «Balapan» arnasynyń dırektory Qymbat Dosjan, Elbasy Akademııasy QQ Basqarýshy dırektory Murat Jumanbaı, «Qazaqstan KVN Odaǵynyń» tóraǵasy Esen Eleýken, «Biz birgemiz» QQ tóraıymy Perızat Qaırat syndy qoǵam belsendileri, jýrnalıster men blogerler qatysty.
Strımıng platformany júzege asyrýshy avtorlary, balalar kontentin jasaýshy mamandar Maqpal Jumabaı men Sandýǵash Baımahanqyzynyń aıtýynsha, bul joba 2020 jyly qolǵa alyndy.
Jobanyń brend-ambassadory Dáýlet Muqaev óz sózinde ár ata-anaǵa balalaryna atalǵan qosymshany júktep berýge keńes berdi. Onyń aıtýynsha, ÖZINŞE tek onlaın kınoteatr ǵana emes, balalarǵa ana tilinde sapaly, tárbıeli kontent usynatyn senimdi alań.
Jańa servıs Qazaqstan halqynyń 12%-yn, ıaǵnı 2 264 600 adamdy quraıtyn balalardyń jáne sheteldegi qazaq jasóspirimderdiń suranysyna qyzmet etedi.
Mobıldi qosymshanyń ataýy erekshe mánge ıe. ÖZINŞE strımıng-platformasy ómirde óz qalaýyn erkin jasap, óz tańdaýymen ómir súrýge umtylǵan búgingi jańashyl jasóspirimderge arnalǵan.
Mobıldi qosymshany kez kelgen adam IOS jáne Android mobıldi operasııalyq júıelerinde tegin júkteı alady.
Búginde servıske kólemi 3400 mın quraıtyn mýltserıaldar men teleserıaldardyń lısenzııalyq quqyqtary satyp alynyp, júkteldi. Qazirgi ýaqytta ÖZINŞE Nickelodeon telearnasymen jáne basqa da álemdik stýdııa ókilderimen kelissózder júrgizip jatyr. Joba avtorlary júıeniń júıeli túrde jańaryp, tolyqtyrylyp otyratynyn jetkizdi.
Aıta ketsek, ÖZINŞE ujymy daıyn ónimderdi satyp alýdan bólek, ózindik jobalar óndirisin de qolǵa aldy. Jýyrda balalar men jasóspirimderge arnalǵan 2 joba túsirilimi bastalady.
