Semserlesýshilerdiń álem chempıonaty sonaý 1921 jyldan beri uıymdastyrylyp keledi. Sol 101 jyl aralyǵynda KSRO men Reseı sportshylary eń kóp oljaǵa keneldi. Olar 322 (148 altyn+86 kúmis+88 qola) medalǵa qol jetkizdi. Italııanyń kósh basyndaǵy komandadan júldeler sany kóp bolǵanymen, sapasy jaǵynan reseılikterge ese jiberip, jalpy esepte ekinshi oryndy ıelenýde. Apennın túbeginiń túlekteri 350 (116+103+131) júlde oljalady. Úshinshi orynda – Fransııa quramasy (91+90+95). Sondaı-aq ozyq 10 komandanyń sanatynda Majarstan (91+86+94), Germanııa (47+56+57), Polsha (17+29+39), Rýmynııa (13+25+29), Ýkraına (12+12+17), AQSh (10+12+11) jáne Qytaıdyń (8+19+17) órenderi bar. Atalǵan jarysta barlyǵy 24 memlekettiń ánurany shyrqalyp, 38 eldiń týy bıikte jelbiredi. О́kinishke qaraı, olardyń qatarynda Qazaqstannyń birde-bir semserlesýshisi joq.
«Qazirgi kezde qaı komandanyń qarqyny kúshti?» degen saýalǵa tushymdy jaýap alý úshin sońǵy bes álem chempıonatynyń nátıjelerine zer salǵan jón. Máselen, 2015 jyly Máskeýde uıymdastyrylǵan jarysta tórt altynnan oljalaǵan Reseı men Italııa kómbege birdeı jetti. Biraq kúmis medaldary artyq jarys qojaıyndary jalpy esepte kósh bastady. Reseılikter 9 (4+4+1) júlde alsa, ıtalııalyqtar 5 (4+0+1) medaldy qorjynǵa saldy. Úshinshi orynda – Ýkraına (1+1+1).
2016 jyly Rıo-de-Janeıroda semserlesý sportynyń Olımpıada baǵdarlamasyna enbegen túrleri boıynsha básekeler uıymdastyryldy. Iаǵnı shpagadan erlerdiń jáne rapıradan áıelderdiń komandalyq saıystary ótti. Bul básekeniń ekeýinde de Reseıdiń baǵy jandy. Majarstan men Italııa fınalda utylsa, Rýmynııa men Fransııa úshinshi satyǵa taban tiredi. 2017 jyly Leıpsıgte Italııanyń órenderi (4+1+4) aldaryna jan salmady. Ekinshi jáne úshinshi oryndardy Reseı (3+0+3) men Ońtústik Koreıa (1+2+0) ıelendi.
2018 jyly Qytaıdyń Ýsı qalasynda da Apennın túbeginen kelgen sańlaqtardyń (4+2+1) asyǵy alshysynan tústi. Ońtústik Koreıanyń oǵlandary (2+2+3) ekinshi oryn alsa, AQSh (2+2+2) úzdik úshtikti túıindedi. Qazaqtan qurama komandasy músheleri arasynan Dmıtrıı Aleksanınniń jeńis tuǵyryna kóterilýine jaqsy múmkindigi boldy. Dúnıejúzilik Ýnıversıadanyń qola júldegeri degen ataǵy bar 26 jastaǵy Almaty qalasynyń týmasy shırek fınalǵa deıin jetkenimen, bul mejede Olımpııa oıyndarynyń jeńimpazy, álemniń eki jáne Eýropanyń tórt dúrkin chempıony, fransııalyq Iаnnık Borelge jol berdi.
2019 jylǵy dúnıejúzilik dodany Býdapesht qalasy qabyldady. Dýnaıdyń jaǵalaýyndaǵy jarysta Reseı sportshylary (3+3+1) ozdy. Fransııa (2+3+0) men Ońtústik Koreıanyń (2+0+2) ánurany eki márte shyrqalsa, Majarstan (1+2+0), Ýkraına (1+1+2), Qytaı (1+1+0), AQSh (1+0+1) jáne Brazılııa da (1+0+0) tabysty óner kórsetti. Atalǵan jarystardyń talaıynda top jaryp, únemi aldyńǵy lekte júrgen ıtalııalyqtarǵa bul joly bas júlde buıyrmady. Barlyǵy bir kúmis pen jeti qolany qanaǵat tutqan olar komandalyq esepte toǵyzynshy orynda qalyp qoıdy. Ulybrıtanııa bir kúmispen kúptelse, Gonkong, Grekııa, Iran, Rýmynııa jáne Shveısarııa jalqy qolany enshiledi.
Majarstannyń astanasynda Qazaqstannyń semserlesýshileri arasynan Rýslan Qurbanov eń jaqsy nátıje kórsetti. Dúnıejúzilik Ýnıversıadanyń eki dúrkin júldegeri shpagadan ótken saıysta úzdik segiz sportshynyń qataryna qosyldy. Jarysty óte qarqyndy bastaǵan jerlesimizdiń shırek fınalda Eýropa chempıonatynyń kúmis júldegeri, ýkraınalyq Igor Reızlınge áli jetpedi. Dál sol Reızlın atalǵan jarysta kúmis pen qola medal alsa, 2021 jyly Tokıoda alaýy tutanǵan Olımpııa oıyndarynda úshinshi oryndy ıemdendi.
Al Kaırdegi jarysta Qazaq eli namysyn Rýslan Qurbanov, Elmır Álimjanov, Dmıtrıı Aleksanın, Vadım Sharlaımov, Erlik Sertaı (shpaga, erler), Sofııa Nıkolaıchýk (shpaga, áıelder), Artem Sarkısıan, Nazarbaı Sattarhan, Muhamedáli Rahmanáli, Janat Nábıev (shpaga, erler), Tatıana Prıhodko, Áıgerim Sarybaı, Karına Dospaı, Anastasııa Gýlık jáne Tatıana Prıhodko (shpaga, áıelder) syndy sańlaqtar qorǵaıdy. Mysyrda jerlesterimizge eń bolmaǵanda bir júlde buıyrsa degen tilektiń ústinde otyrmyz.
