Taıaýda ǵana Londonda ótken «Ýımbldon» týrnırinde aıdy aspanǵa shyǵaryp, bas júldeni oljalaǵan 23 jastaǵy jerlesimiz álemdik reıtıngte joǵarylamasa da, materıaldyq turǵydan biraz oljaǵa keneldi. Odan bólek, ol taǵy birqatar dúbirli dodada baq synady. Keıde sátti óner kórsetse, keıde jeńilistiń kermek dámin tatty degendeı. Jyl basynan beri Elena Rybakına 3,3 mıllıon AQSh dollary kóleminde tabys tapty. Bul – joǵaryda atalǵan reıtıngtegi jetinshi nátıje.
Al úlde men búldege oranǵandardyń tizimin Iga Sventek bastap tur. 21 jastaǵy Polshanyń asa daryndy oıynshysy bıyl «Rolan Garrosta» top jaryp, Aýstralııanyń ashyq birinshiliginiń jartylaı fınalyna deıin jetti. Sonymen qatar Doha, Indıan-Ýells, Maıamı jáne Shtýtgarttaǵy jarystarda bas júldeni oljalady. Osyndaı jarqyn jeńisteriniń arqasynda Sventek osy jyldyń ózinde-aq 6,6 mıllıon dollarǵa baıydy. Qazirgi kezde polıak qyzy álemdik reıtıngte kósh bastap tur.
Ekinshi orynda – Rafael Nadal. 36 jastaǵy Ispanııanyń dańqty tennısshisiniń baǵyndyrmaǵan belesi joq. Qazirgi kezde ATR reıtınginde tórtinshi orynǵa turaqtaǵan Nadal bıyl «Úlken dýlyǵa» sanatyndaǵy eki birdeı týrnırdiń jeńimpazy atandy. Alǵashynda ol Aýstralııanyń ashyq birinshiliginde aldyna jan salmasa, kóp keshikpeı Rolan Garrosta dara shyqty. Úshinshi satyǵa Karlos Alkaras jaıǵasty. Ol da Ispanııanyń týmasy. Osydan eki jyl buryn ǵana qalyń toptyń arasynda júrgen 19 jastaǵy saıypqyran byltyrǵy maýsymdy 32-orynmen qorytyndylasa, qazirgi kezde úzdikter tiziminde altynshy satyǵa turaqtady. Alkarastyń tabysy – 4,3 mıllıon.
Sondaı-aq bıyl mol oljaǵa kenelgender qatarynda Novak Djokovıch (4,2 mln), Stefanos Sısıpas (3,6 mln), Ons Jaber (3,4 mln), Kasper Rýýd (2,9 mln), Teılor Frıs (2,6 mln), Aleksandr Zverev (2,6 mln), Danııl Medvedev (2,5 mln), Eshlı Bartı (2,3 mln), Hýbert Hýrkach (2,1 mln), Felıks Oje-Alıassım (2,1 mln), Andreı Rýblev (2 mln) jáne Iаnnık Sınner ( 2 mln) syndy sańlaqtar bar.
