Qyzyl jalynǵa oranǵan jerdiń 60 gektary ormandy alqap bolsa, 330 gektary qumdy, sazdy jer. Ara-arasynda syńsyǵan qamysy, shalǵyn shóbi bar. Qalaı degenmen, tıgizgen zardaby az emes.
14 shilde. Keshki saǵat alty shamasynda Zaısan orman sharýashylyǵynyń kúzetshisi Qanat Alıpanovqa Qara Ertis orman sharýashylyǵyna qarasty Segizbaı ýchaskesine jalyndaǵan órt enip ketkenin habarlaıdy. Oqys oqıǵany kórgen kýágerlerdiń aıtýynsha, qyzyl jalyn Boran aýyly jaqtan kelgen eken. Tilsiz jaý dese, degendeı. Áýelde órttiń qaıdan, qalaı shyqqanyn eshkim baıqamaǵan. Jeldiń ekpinimen údeı túsken. Az ǵana ýaqyttyń ishinde kúsh alǵan órt memlekettik orman qorynyń 25, 26, 27-shi alqaptaryna túsip úlgergen.
Tabıǵat qorǵaýshylar habardy ala sala, oqıǵa ornyna attanǵan. Aldymen kishi órt sóndirý kesheniniń mamandary shyqqan. Onyń ishinde Qaratal ormanshylyǵynyń 12 qyzmetkeri bar. О́rtti toqtatý múmkin emestigin baıqaǵan soń Samar, Katonqaraǵaı aýdandarynan qosymsha kúshter jumyldyryldy. Zaısan qalasynyń 25 órt sóndirý bóliminiń ákki mamandary da oqıǵa ortasynan tabyldy. Esep-qısappen berilgen derekterge kóz júgirtsek, uzyn sany 86 adam órtke qarsy turypty. Lapyldaǵan órtpen on saǵatqa jýyq arpalysqan olar Birjan aýylyna 50 shaqyrym qalǵanda biraq aýyzdyqtaǵan. О́rtti sóndirip bolǵan soń da shoq qaıta tutanbasyn dep, Zaısan orman sharýashylyǵynyń mamandary kúıgen dalany kúzetip qalǵan.
– Negizi órt Marqakól jaqtan bastalǵan. Esepteýimizshe, 390 gektar aýmaqty sharpyp ótti. Ásirese qamysqa túsken otty óshirý ońaıǵa soqpady. Ertis boıymen quldılap jana berdi. Jalańdaǵan jalynnyń janyna jolaý da qıyn boldy. Onyń ústine, shekaraǵa taıaý bolǵandyqtan tikushaq ta kótere almadyq. Jalpy, 14 tehnıka, 90-ǵa jýyq adam tilsiz jaýmen alysty. Anyqtalǵandaı, órt naızaǵaı otynan shyqqan. Negizi, órttiń 90 paıyzy naızaǵaıdan shyǵady. Qalǵany adamı faktor, – deıdi Shyǵys Qazaqstan oblystyq orman sharýashylyǵy bóliminiń bas mamany Nurlan Sáttibaev.
Iá, 390 gektar aýmaq az emes. Qanshama ań-qus órttiń saldarynan aýyp ketti deseńshi. Qańqyldaǵan qaz-úırektiń bári ushqan shyǵar. Áıtpese, Qara Ertistiń boıy tumsa tabıǵat, jortqan ań, saıraǵan qus. О́kinishtisi sol, masatydaı qulpyryp, jaınap turǵan tabıǵatqa túrli apattar osylaısha azdy-kópti zardabyn tıgizip ketedi. Tabıǵı qubylys. Ýaqyt óte órteń jerge de kók shyǵyp, qaz-qalpyna qaıta keledi. Deıturǵanmen, taý-tas, orman-toǵaı kezgen demalýshylar da asa saq bolǵandary jón. Bir tal sirińke myń taldy kúl etetindeı qaýqary baryn umytpaıyq.
Shyǵys Qazaqstan oblysy,
Zaısan aýdany
