Vladımır Pýtın Nursultan Nazarbaevqa alǵysyn bildirdi

ASTANA. 1 mamyr. Mınskide ótken Joǵary Eýrazııalyq ekonomıkalyq keńestiń otyrysynda Memleket basshysy Nursultan Nazarbaev Eýrazııalyq ekonomıkalyq odaq týraly shart jobasyn qaraý barysynda pysyqtaı túsýdi qajet etetin birqatar máselelerge óz áriptesteriniń nazaryn aýdardy. Bul týraly «Qazaqstan jańalyqtary» habarlady. Eýrazııalyq ekonomıkalyq keńistik jáne Keden odaǵy aıasyndaǵy ózara yqpaldastyq máselelerin talqylaý maqsatynda Qazaqstan, Reseı, Belarýs elderiniń Prezıdentteri Mınskide bas qosqan bolatyn. Osy jıynda Memleket basshysy Eýrazııalyq ekonomıkalyq odaqqa qatysýshy taraptardyń barlyq múddeleri men quqyqtary barynsha saqtalýy qajettigin aıta otyryp, mamyr aıynda qabyldanýy tıis kelisim-shart jobasyna qatysty áli de pysyqtaýdy qajet etetin birqatar jaǵdaıattarǵa toqtaldy. Kezdesýde Nursultan Nazarbaev: «Meılinshe kúrdeli jaıttar úshin ótpeli kezeń qajet bolady. Barlyq máselelerdi biz Keden odaǵyn qurý jáne Biryńǵaı ekonomıkalyq keńistikti qalyptastyrý kezinde talqylaǵanymyzdy eske salǵym keledi. Búgin biz ár tarmaqty senimmen talqylap, ne istegenimiz jón ekenin sheshetin bolamyz dep oılaımyn. Biz árdaıym bátýalastyqqa qol jetkizip keldik jáne alda da solaı bolady dep senemin, – dedi. О́z kezeginde Reseı Prezıdenti Vladımır Pýtın atalǵan odaqty qurýǵa Qazaqstan jaǵynyń joǵary deńgeıde belsendilik tanytqanyn atap ótti. Vladımır Pýtın:  «Nursultan Ábishuly Nazarbaevqa zor alǵysym men rızashylyǵymdy bildiremin, óıtkeni ol osy birlestiktiń rýhtandyrýshysy boldy. Áýelden bul onyń ıdeıasy edi, muny men esimde jaqsy saqtadym», – dedi. Al Belarýs Prezıdenti Aleksandr Lýkashenko: «Bizdiń odaqtyń basqa elder úshin tartymdylyǵy onyń qanshalyqty tıimdi bolatynyna baılanysty. Biraq odaqtyń ózi de onyń aıasynyń keńeıýi esebinen úlken qundylyqqa ıe bolýǵa tıis», – dedi. Sondaı-aq, Mınsk kezdesýinde eýrazııalyq ekonomıkalyq ıntegrasııanyń órisin keńeıtý kerektigi sóz etildi. Jıyn sońynda Eýrazııalyq ekonomıkalyq odaq týraly shart jobasyn daıyndaý jumysynyń qorytyndysy shyǵaryldy. Joldybaı Bazar. Derekkóz: «Qazaqstan jańalyqtary». Foto: Headlain.kz.