Búkil elimiz boıynsha Qazaqstan halqynyń birligi kúni toılanýda

ASTANA. 1 mamyr. Búgin Memleket basshysy Nursultan Nazarbaevtyń qatysýymen Astanadaǵy  «Qazaq Eli» monýmenti aldynda Qazaqstan halqynyń birligi kúni meıramy saltanatty jaǵdaıda bastaldy. Sondaı-aq, elimizdiń barlyq aımaqtarynda da merekelik dýman óz shymyldyǵyn ashty. Bul týraly egemen.kz tilshisi habarlady. Astanadaǵy «Qazaq eli» monýmenti alańyndaǵy konserttik baǵdarlamalar úsh túrli sahnada júrgizilýde. Bul mádenı sharalar kúni boıy tolastamaıdy. Negizgi sahnada 700-den astam jekelegen ónerpazdar men shyǵarmashylyq ujymdar halyqqa kóterińki kóńil-kúı syılamaq. Sahnada «Naz» bı ansambli, «Shabyt» qazaq ulttyq óner ýnıversıtetiniń bı toby, О́skemen qalasynyń «Flesh» balet toby, Qaraǵandynyń «Istorka» bı ansambli, Shymkent qalasynyń «Shamsınýr» jáne «Aıgólek» bı toptary, sondaı-aq TMD elderinen – «Vaınah» bı ansambli (RF Sheshen Respýblıkasy), Omby (Reseı) memlekettik bı jáne án ansambli, Tbılısıdiń grýzın ulttyq hory, Ankaranyń túrik ulttyq hory kópshilikke óz ónerlerin usynady.  Bulardyń arasynda basqa da memleketterden kelgen   – Zıther (Germanııa), Madan Oak (Úndistan), Chjý (Qytaı)  syndy ánshiler de bar. Al kishi sahnada 17.00-ge deıin 23 etnomádenı birlestik ókilderi  óner kórsetedi. Alańda ár eldiń mádenıeti men tarıhynan syr shertetin Qazaqstan halqy Assambleıasynyń etnomádenı qalashyǵy qurylǵan. Sonymen qatar, arnaıy daıyndalǵan sporttyq alańdarda arqan tartys, toǵyzqumalaq, gir kóterý syndy oıyndardan saıystar uıymdastyrylady. Aldyn ala habarlaǵanymyzdaı, merekelik baǵdarlama elimizdiń belgili ánshileriniń konsertimen jalǵasady. Joldybaı Bazar. Derekkóz: egemen.kz. Foto: «QazAqparat».