«Nursultan Nazarbaev. О́mirbaıan» atty kitap vengr tilinde jaryqqa shyqty

ASTANA. 1 mamyr. Vengrııa astanasy Býdapeshtte «Nursultan Nazarbaev. О́mirbaıan» atty kitaptyń vengr  tilindegi nusqasynyń tusaýkeseri boldy. Bul týraly «24kz» habarlady. Prezıdent keńsesiniń jetekshisi, saıası ǵylymdar doktory, professor Mahmut Qasymbekovtyń avtorlyǵymen shyqqan bul eńbek osyǵan deıin orys, aǵylshyn jáne arab tilderine aýdarylǵan. Kitapta Memleket basshysynyń balalyq shaǵynan bastap búginge deıingi ómiri, baǵyndyrǵan asýlary, el úshin atqarǵan qyzmeti qamtylǵan. Mahmut Qasymbekov bul kitapty 2012 jyly baspadan shyǵarǵan bolatyn. Eńbektiń vengr tilindegi nusqasynyń jaryq kórýine Qazaqstannyń Vengrııadaǵy elshiligi qoldaý kórsetken. Býdapeshtegi  ǵylym akademııasynyń ǵımaratynda ótken tusaýkeser rásimine Vengrııanyń resmı tulǵalary, ǵalymdary, saıasattanýshylary, sondaı-aq, qazaq dıasporasynyń ókilderi qatysty. Tusaýkeserde Vengrııanyń О́ńirlik damý mınıstri Shandor Fazekash: «О́te keremet jazylǵan kitap. Qazaqstannyń qarqyndy damýy, álemge tanylýy el Prezıdenti Nursultan Nazarbaevtyń salıqaly saıasatynyń arqasy. Sanaýly ýaqytta sáýleti erekshe Astana turǵyzý – tek dáýletti memleket pen myqty basshynyń ǵana qolynan keletin is, – dedi. Al Mahmut Qasymbekov Vengrııadaǵy atalǵan shara barysynda: «Men óz basym, kitaptyń vengr tilinde shyǵýy – vengr halqynyń QR Prezıdentine, ol basqaryp otyrǵan Qazaqstannyń eline úlken qurmeti, syı-syıapaty dep bilemin, – dedi. Kitaptyń tusaýkesirinen keıin Qazaqstan delegasııasy Iаnosh Kodolanı atyndaǵy qoldanbaly ǵylymdar ýnıversıtetinde «Qazaqstan joly jáne Nazarbaev» atty qurmetti kafedranyń ashylý saltanatyna qatysty. Vengr jerindegi jetekshi bilim ordasyndaǵy bul kafedra stýdentter men oqytýshylarǵa Qazaqstannyń búgini men bolashaǵynan, qazaq halqynyń tynys-tirshiliginen, mádenıeti men órkenıetinen aqparat beretin bolady. Joldybaı Bazar. Derekkóz: «24kz». Foto: «24kz».