Fýtbol. Qazaqstan Premer-lıgasynyń 9-týry oınaldy

ASTANA. 1 mamyr. Búgin fýtboldan Qazaqstan chempıonaty premer-lıgasynyń 9-týrynyń oıyndary oınaldy. Bul týraly egemen.kz tilshisi habarlady. Týrda 2 oıynnyń nátıjesi 1:0 bolyp aıaqtaldy. Tarazda jergilikti «Taraz» Taldyqorǵannyń «Jetisýyn», Aqtóbede jergilikti «Aqtóbe» Almatynyń «Qaıratyn» osyndaı shaǵyn eseppen tize búktirdi. Oıyndarda goldardy tarazdyq Alekseı Shetkın (90-mınýt) men aqtóbelik Marat Haırýllın (25-mınýt) saldy. Taǵy eki kezdesýde 1:1 degen esep tirkeldi. Ol «Spartak» (Semeı) – «Qaısar» (Qyzylorda), «Atyraý» - «Ordabasy» (Shymkent) komandalary arasynda jasaldy. Semeıde 57-mınýttan bastap 20 mınýt boıy qonaqtar basym bolyp turdy. Goldardy meımandardan Sergeı Strýkov, alań ıelerinen Nemanıa Iovanovıch soqty. Al Atyraýda qonaqtar 18-mınýtta alǵa shyqty (Artem Kasıanov). Munda týra 10 mınýttan keıin esep teńesti (Mılosh Trıfýnovıch). Týrda «Shahter» (Qaraǵandy) – «Astana» arasyndaǵy oıynda esep ashylmady. Munyń esesine, Pavlodarda Qostanaıdyń «Tobyly» jergilikti «Ertistiń» qaqpasyna jaýapsyz úsh dop túsirdi. Alań ıeleriniń qaqpasyn 10-mınýtta týlatqan birinshi goldyń avtory Nurbol Jumasqalıev bolsa,  budan keıin Irjı Eslınek 29 jáne 53-mınýttarda dýbl jasady. Qazir «Aqtóbe» 20 upaımen top bastap keledi. Ekinshi orynda – «Astana», úshinshi orynda «Shahter» tur. Kelesi týrdyń oıyndary 6 mamyr, seısenbi kúni oınalady. Damır Qojamqul. Derekkóz: egemen.kz. Foto: sports.kz.