Taekvondodan álem chempıonatynyń tusaýy 1973 jyly Ońtústik Koreıanyń astanasy – Seýlde kesildi. Sodan keıin sportshylar ár eki jyl saıyn álemniń ár qıyrynda bas qosyp, túrli tústi medaldardy sarapqa saldy. 24 márte uıymdastyrylǵan atalǵan jarysta eń kóp oljaǵa koreıalyqtar keneldi. О́zderi oılap tapqan sport túrinde olar barlyǵy 239 (171 altyn+32 kúmis+36 qola) medal oljalady. Ekinshi oryndy Ispanııa (22+26+63) ıelense, úshinshi satyǵa Taıpeı (15+27+63) jaıǵasty. Úzdik bestiktiń qatarynda Túrkııa (15+21+33) men Iran (14+21+22) bar. Sondaı-aq TOP-10 komandanyń qataryna AQSh (13+21+49), Qytaı (12+13+16), Ulybrıtanııa (7+8+8), Germanııa (6+12+34) jáne Fransııanyń (6+11+17) órenderi qosyldy. Bul básekede barlyǵy 33 eldiń ókilderi altyn tuǵyrǵa kóterilse, júlde alǵan memleketterdiń jalpy sany – 73.
Tórtkúl dúnıeniń teńdessizderi jınalǵan jarysqa Qazaqstannyń ulttyq quramasy 1993 jyldan beri úzdiksiz qatysyp keledi. Alǵashqy úsh jarysta jolymyz bolmady. Nıý-Iork, Manıla jáne Gonkongtaǵy básekelerde tegisteı utyldyq. 1999 jyly Edmontonda shymyldyǵy túrilgen chempıonatta qazaq jankúıerleri alǵash ret medaldyń syńǵyryn estidi. Úıeńki japyraqtar elinde 84 kılo salmaqta synǵa túsken Ádilhan Saǵyndyqov qola medaldy moınynda jarqyratty. Azııa oıyndarynyń qola júldegeri degen ataǵy bar qandasymyz ırandyq Madjı Aflakı men túrkııalyq Iаsın Iаgızden qalyp qoıdy.
2003 jyly Chedjýden qorjynymyz bos qaıtsa, 2005 jyly Germanııanyń Garmısh-Partenkırhen qalasynda Lııa Nurkına úshinshi orynǵa taban tiredi. Qazaq qyzy Olımpıada chempıony Lı Son Hı men horvatııalyq Sandra Charıchti alǵa jiberdi. 2005 jyly Madrıdte qaıta sátsizdikke ushyrasaq, 2007 jyly Beıjińde mol oljaǵa keneldik. Aspanasty elinde Aslan Batyqulov (54 kılo), Arman Shylmanov (84 kılo) jáne Názgúl Tájiǵulova (54 kılo) qola medal ıelendi. Osy kórsetkishtiń arqasynda Qazaqstan quramasy óz tarıhynda tuńǵysh ret jalpy esepte TOP-15 komandanyń qataryna qosyldy. Ol kezde respýblıkalyq federasııany Shamsat Isabekov basqarsa, ulttyq quramany bilikti bapker Maqsut Narbaev jattyqtyrǵan edi.
2009 jyly Kopengagende asa aýyr salmaqta aıqasqan Arman Shylmanov qaıta úshinshi oryndy enshiledi. Sodan bir jyl buryn ǵana qazaqtyń qaısar uly Beıjińde alaýy tutanǵan Olımpııa oıyndarynda qola medal oljalaǵan edi. Danııanyń astanasynda Malıdiń marqasqasy, álem chempıony Daba Modıbo Keıta top jarsa, koreıalyq Nam Iýn Baı ekinshi oryndy ıemdendi. Jalpy, otandyq taekvondo tarıhynda Shylmanovtyń shoqtyǵy ózgelerden áldeqaıda bıik ekeni daýsyz. Joǵarydaǵy ataqtardan bólek, Arman Azııa chempıonatynda bes (1+2+2) jáne Azııa oıyndarynda úsh (0+0+3) júlde aldy. Elimizdiń birde-bir daıan sheberi dál osyndaı ataǵymen maqtana almaıdy.
Osyndaı eleýli tabystardan keıin Qazaqstan taekvondosy quldyraý kezeńin basynan keshirdi. 2011 jyly Kendjý, 2013 jyly Pýebla-de-Saragosa jáne 2015 jyly Chelıabide ótken jarystarda jigersizdik tanytqan jerlesterimiz janarymen jer shuqydy. 2017 jyly Ońtústik Koreıanyń Mýdjý shaharynda 74 kılo salmaqta kúsh synasqan Qaırat Sarymsaqov sýyrylyp shyqty. Onyń aldynda Azııa oıyndary men qurlyq birinshiliginde qos qolany qanjyǵasyna baılaǵan qandasymyz bul joly da dál sol mejeden kórindi.
2019 jylǵy jarysty Ulybrıtanııanyń Manchester qalasy qabyldady. Tumandy Albıon elinde de jalqy qolaǵa qol sozdyq. Bul joly da Qaırat Sarymsaqov úshinshi orynǵa turaqtady. Jalpy, sol chempıonatta álemdik taevkondonyń kóshbasshysy Ońtústik Koreıaǵa jarys qojaıyndary ájeptáýir qarsylyq kórsetti. Desek te sheshýshi tusta namystaryn qamshylaǵan koreıler (4+1+2) jalpy esepte kósh bastady. Brıtandyqtar (3+0+1) ekinshi oryndy enshilese, Qytaı quramasy (2+2+3) úshinshi satyǵa taban tiredi. Oljaǵa kenelgen komandalar qatarynda Taıland (2+0+1), Reseı (1+2+1), Túrkııa (1+1+2), Ázerbaıjan (1+0+1), Kýba (1+0+0) jáne Italııa (1+0+0) bar.
