Et eksportynyń erteńi eńseli

Prezıdent janyndaǵy Ortalyq kommýnıkasııalar qyzmetinde dástúrli brıfıng ótti. Basqosýdyń bul jolǵy qonaqtary Básekelestikti qorǵaý agenttiginiń tóraǵasy Ǵalym Orazbaqov pen Aqtóbe oblysy ákiminiń orynbasary Nurmuhambet Ábdibekov boldy. Qazaqstan men Reseı aýmaǵyna kirgen kezdegi avtosaqtandyrý tarıfi kólemi teńestiriledi. Bul jaıynda Básekelestikti qorǵaý agenttiginiń tóraǵasy Ǵalym Orazbaqov aıtty. «Avtosaqtandyrý tarıfine qatysty shynymen de aıyrmashylyq bar. Búginde qazaqstandyq kólikter Reseı aýmaǵyna kirse, 7 myń teńge tóleýi tıis. Al reseılik kólik Qazaqstan aýmaǵyna kirgende nebári 900 teńge tóleıdi. Aıyrmashylyq bizdiń normatıvtik qujattarymyzda bolyp otyr. Biz Básekelestikti qorǵaý agenttigi retinde Qazaqstan Ulttyq bankine ótinim jasadyq. О́ıtkeni, Ulttyq bank bul qarym-qatynastarda ókiletti organ bolyp tabylady», dedi Ǵ.Orazbaqov. Sondaı-aq, ol búgingi tańda Ulttyq bank elimizdiń Qarjygerler qaýymdastyǵymen birlesip, atalǵan máseleni talqylaý ústinde ekendigin ári aldaǵy ýaqytta Eýrazııalyq ekonomıkalyq komıssııaǵa resmı usynys engizýdi josparlap otyrǵandyqtaryn da tilge tıek etti. «Meniń oıymsha, kelesi jyldan bastap birdeı tarıfpen tóleıtin bolamyz. Sebebi, ony sáıkestendirý úshin ýaqyt qajet. Reseılikter avtosaqtandyrý tarıfin tómendetedi ne bolmasa qazaqstandyq tarap ony kóteretin bolady», dedi agenttik basshysy. «Oblysta «QazAgro» holdıngimen birlesken birneshe joba qolǵa alynǵan. Qazirgi tańda óńirdiń 14 myń iri qara mal ustaýǵa múmkinshiligi bar. Buǵan qosa 60 myń shoshqa baǵatyn ferma ashylyp, jumysyn jolǵa qoıdy. Asyl tuqymdy qoı sharýashylyǵyn jandandyrý máselesi de jolǵa qoıylýda desek, kelesi jyldan bastap osy usaq mal Reseı men Qytaıǵa eksporttalmaq. Byltyr 4,5 myń tonna shoshqa etin óndirdik. Onyń basym bóligi elimizde satylsa, qalǵany eksportqa shyǵaryldy. О́tken jyly 52 tonna iri qara mal etin Reseı naryǵyna shyǵardyq. Bul bastamasy dep oılaımyz. Al bolashaqta alǵa qoıyp otyrǵan maqsatymyz bul kórsetkishti 3,5 myń tonnaǵa jetkizý», dedi basqosýda Aqtóbe oblysy ákiminiń orynbasary Nurmuhambet Ábdibekov. Sonymen birge, ol oblysta sút óndirýge baǵyttalǵan 2 iri joba iske qosylǵanyn da nazardan tys qaldyrmady. Onyń biri – «Aıs» JShS-i bolsa, atalǵan kásiporyn jylyna 7 myń tonna sút shyǵarýda desek, al «Andı» seriktestigi 3,5 myń tonna sút óndiredi eken. Ábdirahman QYDYRBEK, «Egemen Qazaqstan».