Kitapta belgili jýrnalıst, qoǵam qaıratkeri Beısen Quranbek bolmysyna ekzıstensııalyq taldaý jasalǵan. Beısenniń ómirinen mysal keltire otyryp, ekzıstensııa, logoterapııa psıhologııasy uǵymdary keńinen túsindiriledi. Týyndyda adam bolmysy, qalaı ashyldy, qalaı kórinedi, ómirdegi mánin qalaı anyqtaıdy degen ártúrli suraqtarǵa jaýap beriledi.
Tusaýkeser barysynda kitap avtory Sanjar Kerimbaı «Otbasy hrestomatııasy» serıasymen jaryq kórgen eńbektiń erekshelikterine toqtaldy.
Onyń aıtýynsha kitapta B.Quranbektiń ómirinen túrli qyzyqty derekter berilgen. Sondaı-aq oǵan fılosofııalyq, ekzıstensııalyq baǵytta taldaý jasalady. Bul – oqyrmanǵa kitapty jaı ǵana oqyp qoıa salmaı, ondaǵy aıtylǵan oıdyń astaryn, salmaǵyn túsinip, ózin tanýǵa, Beısendi tanýǵa, bolmysqa tereń boılaýǵa múmkindik beredi.
Sondaı-aq ol Beısen Quranbektiń ǵıbratty ǵumyryndaǵy oqıǵalar bútin bir jas býynǵa tárbıe bererlik qasıetke ıe dep sanaıdy. Sondyqtan bolar tanymal jýrnalıstiń adamgershilik qasıetin úlgi etip, oǵan eliktep, ósip kele jatqan balalar bar. Bul oıyn avtor «Beısen ekzıstensııalyq turǵyda tirshiligin jalǵastyryp jatyr» dep túıindedi.
Jıynda kitapty basyp shyǵarýda týyndaǵan máseleler týraly da aıtyldy.
«Kitapty daıyndap, shyǵarýǵa 2-3 aıdyń ǵana kólemi ketti. Mazmunynan bólek, eń kóp ýaqytty qajet etken dúnıe – kitaptyń muqabasy. Osy máselede uzaq aqyldastyq. Birinshiden, tartymdy bolǵanyn qaladyq. Ekinshiden, shyǵarmanyń aty aıtyp turǵandaı keıipkerdiń bolmysyn ashatyndaı sýret bolýy qajet edi. Osy rette muqabanyń 30-dan astam nusqasy jasaldy. Olardyń bárin Beısen aǵamyzdyń jubaıyna jiberip, sol kisimen aqyldasyp otyrdyq. Qazirgi muqaba úlgisin sol kisi tańdady. Ishki tehnıkalyq jumystaryna keler bolsaq, batysqa standartqa súıene otyryp, mınımalızm stılin qoldanýǵa tyrystyq», dedi kitaptyń dızaıneri Arman Ǵınaıatuly.
Aıta keteıik, kitap ekzıstensııa fılosofııasyna, logoterapııa ilimine qyzyǵatyn oqyrmandarǵa arnalǵan.
