Sondaı kásipkerdiń qatarynda kóz dárigeri Asyl Ahmetova da bar. Ol 13 jyl buryn kásipkerlikke bet burǵan. Jeti jyl buryn «Jarqyra» ataýymen kózildirik daıyndaıtyn salon ashqan. Aýyldastarynyń kóz janary sýalmaýyn oılaǵan dáriger kásibiniń materıaldyq bazasyn nyǵaıtý úshin «Bıznestiń jol kartasy-2025» baǵdarlamasyna qujat tapsyryp, 3 mln teńge kóleminde qaıtarymsyz grantqa ıe bolǵan. Sóıtip, salonyn kózdiń qan qysymyn ólsheıtin arnaıy quralmen tolyqtyrdy.
– Qazir kóz aýrýy kóbeıip tur. Bul aýrý jas talǵamaıdy ǵoı. Ásirese balalar arasynda kórý qabileti tómendegeni alańdatady. Balalardyń kóz aýrýyn erte emdemese, keıin asqynyp ketýi múmkin. Olar dárigerge kózin qaratyp, kózildirik alý úshin oblys ortalyǵyna, ózge qalalarǵa bara almaıdy. Osyndaı sebeppen, osy isti qolǵa aldym, – deıdi Asyl Ahmetova.
Kásibin bastaǵaly birneshe ret nesıe alýyna týra keldi. Aldymen Aýyl sharýashylyǵyn qarjylaı qoldaý qorynyń alty paıyzdyq jeńildigimen 6 mln teńgesine qol jetkizdi. Bul qarjyǵa kózdi tekseretin zamanaýı úlgidegi apparattardy, túrli kózildirikti daıyndaıtyn stanoktar ákelgen. Keıin 2020 jyly «Damý» qorynan berilgen 20 mln teńge nesıege balalardyń kóz aýrýyn emdeýge qajetti qural-jabdyqtar satyp alǵan. Ol ashqan salonda mereke kúnderi balalarǵa, kópbalaly analarǵa, múmkindigi shekteýli jandarǵa arnalǵan arnaıy jeńildik jasalady. Qazir Qulsary qalasyndaǵy eki núktede alty adamǵa jumys berip otyr. Olardyń jalaqysyn ýaqtyly tóleıdi.
Bul aýdanda atalǵan baǵdarlamamen medısına salasyndaǵy kásibin bastaǵan jannyń taǵy biri – Aızada Qalýova. Tis emdeý isinde besjyldyq eńbek ótili bar ol byltyr «Bıznestiń jol kartasy-2025» baǵdarlamasynyń qarjylaı grantyn alǵan. Qazir úsh mamandy turaqty jumysqa tartyp otyr.
– Tis emdeýdiń ózindik qıyndyǵy, tásili bar. Jańa tehnologııalar da engizilip jatyr. Sondaı ınnovasııalyq apparatty satyp alyp, tis emdeýdi bastadym. Bul apparattyń ereksheligine toqtalsam, tistegi kórinbeıtin ınfeksııany 25 esege úlkeıtedi. Kásibimdi bastaý úshin memlekettiń qaıtarymsyz qarjy beretini bizge úlken qoldaý bolyp otyr, – deıdi Aızada Qalýova.
Atyraý oblysy
