Pavlodar qalasynyń Kataev atyndaǵy oqýshylar saraıynyń alańynda uıymdastyrylǵan mektep jármeńkesine 15 kásipker atsalysyp, kelýshilerge mektepke qajet qural-jabdyqtar men kıim-keshekterdiń mol túrin usyndy.
«Jármeńkede taýarlaryn satýǵa ákelgen kásip ıeleriniń basym bóligi óz nıetterimen kelip otyr. Biz munda satylatyn ár taýar bazardaǵydan arzan ári ár satyp alýshyǵa belgili kólemde jeńildik bolýǵa tıis ekenin aldyn ala habarlaǵanbyz. Keliskendeı, jármeńkedegi baǵa satyp alýshylar kóńilinen shyǵýda», dep atap ótti óńirlik bilim berý basqarmasynyń bas mamany Janara Smataeva.
Vıktorııa esimdi satýshy kelýshilerdiń deni dápter, kúndelikter men qalamsapty kóp satyp alyp jatqanyn jetkizdi. Bilim kúni jaqyndaǵanda ata-analar arnaıy quraldardy, atap aıtqanda, transporter, sırkýl, syzǵysh sııaqty zattarǵa suranysty jıilete túsedi eken. «Baıqaǵanymyzdaı, dápterdi kóp satyp alyp jatyr. Bir alǵanda syrty jumsaq 20-30 dápter jáne kemi 10-15 dana qatty muqabaly qalyń dápter alady. Bıyl keńse taýarlarynyń baǵasy byltyrǵymen salystyrǵanda eki esege jýyq ósti. Bizge kóterme baǵada jetkizýshi fırmalar aldaǵy ýaqytta mektep quraldarynyń quny taǵy da ósýi múmkin ekenin aıtty», deıdi kásipker.
Juqa 12 bettik dápter búginde jergilikti saýda úıleri men bazarlarda shamamen 45 teńge, qalam 100-200 teńge tursa, jármeńkede sál arzanyraq baǵada satyldy. Al sórelerde turǵan oqýshy kıimi men sporttyq kıimderdiń kóbi sapa turǵysynan kózge túse qoımady. Kásipkerler baǵasy arzan bolǵany úshin arzanqol materıaldan tigilgen kıim-keshekterdi ákelgenge uqsaıdy. Soǵan oraı, mektepke qajet kıim-keshek satyp alǵandar qarasy kóp bolmady.
Anar Beısen esimdi ana bıyl 3 balasyn mektepke daıyndap jatyr. Aıtýynsha, bazardaǵy baǵa sharyqtap tur. Amalsyzdan, qaladaǵy keńse zattaryn satatyn dúkenderdi jaǵalap, eń arzan degen qural-jabdyqtardy tańdap júr. Jármeńkede kelýshilerge usynylǵan keıbir taýarlar bazardyń narqymen birdeı. Aldaǵy ýaqytta mundaı jármeńkeler uıymdastyrylǵanda bilim basqarmasy baǵany áli de tómendetýge yqpal etse degen tilegin jetkizdi kópbalaly ana.
Jármeńke barysynda alańda logoped, psıholog jáne pedıatr mamandar jumys istep, ata-analarǵa tegin aqyl-keńester berdi.
Bıyl dástúrli aksııa «Mektepke jol – shekarasyz jaqsylyq» uranymen ótýde. Maqsat – az qamtylǵan, kópbalaly otbasylardan shyqqan jáne jetim balalarǵa, sonymen qatar ata-anasynyń qamqorlyǵynsyz qalǵan oqýshylarǵa oqý jylynyń bastalýyna oraı materıaldyq qoldaý kórsetý. О́ńirlik bilim berý basqarmasynyń málimetinshe, oqýshylarǵa atalǵan aksııa sheńberinde mektepke daıyndalýǵa kómek retinde jappaı oqytý qorynan 1,4 mlrd teńge qarajat bólý qarastyrylǵan. Al jyldyń alǵashqy jartysynda 13 myńnan astam balaǵa 458,2 mln teńge kóleminde kómek kórsetildi. Bul qarajat bilim ordalarynda balalardy ystyq tamaq, kıim-keshek, mektep quraldarymen qamtýǵa, kýrorttyq uıymdarǵa jáne demalys lagerlerine joldama alýǵa jumsalǵan.
Qazir qaıyrymdylyq is-sharasyna jergilikti demeýshilerdi, áleýmettik seriktesterdi, memlekettik uıymdardy tartý boıynsha jumystar júrgizilýde. Bıyl aýyldar úshin kásipkerlermen birlesip shalǵaıdaǵy eldi mekenderge kóshpeli mektep avtodúkenderin uıymdastyrý qolǵa alyndy. Máselen, «Saǵymbaı» sharýa qojalyǵy Ertis aýdanyndaǵy Birlik negizgi mektebiniń 6 oqýshysyna keńse taýarlary salynǵan sómkeler satyp alǵan. Ertis aýylynyń turǵyny J.Maǵaýova 100 myń teńge somasyna balalarǵa arnalǵan mektep formasynyń 8 jıyntyǵyn tabys etti. «Incom company» JShS dırektory S.Pochınok az qamtylǵan otbasylardan shyqqan 50 balaǵa 115 myń teńge somasynda mektep jáne sport sómkelerin alyp bergen.
Oblys ortalyǵyndaǵy №7 orta mektep dırektorynyń tárbıe isi jónindegi orynbasary Meńtaı Muhtarovanyń aıtýynsha, bilim ordasyna «Mektepke jol» aksııasy úshin 1,5 mln teńge qarajat bólingen.
– 58 oqýshyny mektepke daıyndaý josparlanyp otyr. Olarǵa keńse quraldary tolyǵymen taratyldy. Aldaǵy ýaqytta jyly kúrteler, aıaqkıimder satyp alynbaq. Qazirgi tańda demeýshilerge de hat joldandy. Jaýap kútýdemiz, – deıdi ustaz.
Osy ýaqytqa deıin jańa oqý jylyna ázirlik boıynsha óńirdegi 300 balaǵa kómek kórsetilgen.
Murat QAPANULY,
«Egemen Qazaqstan»
Pavlodar oblysy
