Astanada áskerı jáne arnaýly ataqtar tapsyrý rásimi ótti

ASTANA. 6 mamyr. Otan qorǵaýshylar kúni qarsańynda Memleket basshysy, Qarýly Kúshterdiń Joǵarǵy Bas qolbasshysy Nursultan Nazarbaev birqatar azamatqa kezekti joǵary áskerı jáne arnaýly ataqtar, synyptyq shender tapsyrdy. Bul týraly akorda.kz habarlady. Memleket basshysy osy berilgen ataqtar búkil áskerı qyzmet barysyndaǵy eren eńbektiń nátıjesi ekenine toqtala otyryp: «Bul – memleket tarapynan berilgen joǵary baǵa. General bolý – zor mártebe, sizder oǵan laıyqty bolýǵa tıissizder.  Myqty densaýlyq jáne qyzmetterińizge tabys tileımin», – dedi. Sonymen, shara barysynda Ulttyq ulannyń bas qolbasshysy R.Jaqsylyqov,  Qorǵanys mınıstriniń orynbasary O.Saparov general-leıtenant ataǵyn aldy. General-maıor sheni Ulttyq ulan bas qolbasshysynyń birinshi orynbasary B.Ashkarovqa, Tótenshe jaǵdaılar mınıstrligi azamattyq qorǵanys departamentiniń dırektory J.Jumashevqa, Áýe shabýylyna qarsy qorǵanys áskerleriniń qolbasshysy N.Muqanovqa, Áýe qorǵanysy kúshteri bas qolbasshynyń birinshi orynbasary – Áýe qorǵanysy kúshteri Bas shtabynyń bastyǵy M.Ýashpaevqa, óńirlik qolbasshylyq kúshteri qolbasshysynyń birinshi orynbasary – «Ońtústik» óńirlik qolbasshylyǵy kúshteriniń qolbasshysy basqarmasynyń shtab bastyǵy M.Hýsaıynovqa berildi. Al Ulttyq qaýipsizdik qyzmetiniń general-maıory arnaýly ataǵy Ulttyq qaýipsizdik komıteti tóraǵasynyń orynbasary S.Ábishke, Astana qalasy boıynsha departamenttiń bastyǵy K.Elýbaevqa, Aqtóbe oblysy boıynsha departament bastyǵy N.Qydyrbaevqa usynyldy. Qarjy polısııasynyń general-maıory arnaýly ataǵyn Ekonomıkalyq qylmysqa jáne sybaılas jemqorlyqqa qarsy kúres agenttigi tóraǵasynyń orynbasary A.Bodanov aldy. «Syrbar»  Syrtqy barlaý qyzmeti dırektorynyń orynbasary R.Omarov syrtqy barlaý qyzmetiniń general-maıory arnaýly ataǵyn ıelendi. Polısııa general-maıory arnaýly ataǵy Qaraǵandy oblysy ishki ister departamentiniń bastyǵy M.Japparovqa, Almaty qalasy ishki ister departamentiniń bastyǵy S.Kúdebaevqa, Qostanaı oblysy ishki ister departamentiniń bastyǵy T.Matkenovke tapsyryldy. 3-synypty  ádilet memlekettik keńesshisi synyptyq sheni Soltústik Qazaqstan oblysynyń prokýrory S.Zaıtlerge, Batys Qazaqstan oblysynyń prokýrory S.Qaramanovqa, Ońtústik Qazaqstan oblysynyń prokýrory I.Imanovqa tapsyryldy. Joldybaı Bazar. Derekkóz: akorda.kz. Foto: akorda.kz.