Saıasat Nurbek Úkimet otyrysynda ǵylymı-zertteý ekojúıesin qalyptastyrý jáne serpindi tehnologııalardy damytý úshin ýnıversıtetterdi zertteýge aınaldyrý josparlanyp otyrǵanyn aıtty.
Mınıstrdiń sózinshe, ál-Farabı atyndaǵy QazUÝ qazirdiń ózinde zertteý ýnıversıteti mártebesin alǵan.
«Gýmılev atyndaǵy EUÝ men M.Áýezov atyndaǵy OQMÝ-dy ǵylymı-zertteý ýnıversıtetine kóshirý jumystary júrgizilip jatyr», dedi S.Nurbek.
Sondaı-aq ol sheteldik joǵary oqý oryndarynyń fılıaldaryn ashý týraly da baıandady.
«2021 jyly De Montfort Leicester ýnıversıtetiniń fılıaly ashyldy. Petropavlda Arizona ýnıversıtetiniń fılıaly ashylyp jatyr. Sheteldik ýnıversıtetpen yntymaqtastyq aıasynda qos dıplomdyq bilim berý baǵdarlamalary iske qosyldy.
О́tebaev atyndaǵy Atyraý munaı jáne gaz ýnıversıtetiniń bazasynda Gýbkın atyndaǵy Reseı memlekettik ýnıversıtetiniń fılıaly ashylady. Almatyda ál-Farabı atyndaǵy QazUÝ bazasynda Ulttyq zertteý ıadrolyq ýnıversıtetiniń fılıaly ashylyp jatyr», dedi Ǵylym jáne joǵary bilim mınıstri.
Sondaı-aq onyń aıtýynsha, 2023 jyly Nur-Sultanda Michigan State University memlekettik ýnıversıtetin ashý josparlanyp otyr.
