Jasyl beldeýler dep otyrǵanymyz óndiristik kásiporyndardyń sanıtarlyq-qorǵaý aımaǵynda otyrǵyzylǵan aǵash taldary. Byltyr óńirlik ekologııalyq keńeste oblys basshysy Ábilqaıyr Sqaqov jergilikti ekologtermen biraz máseleni qaýzap, zııandylyǵy joǵary óndiris oryndary mańynda jasyl jelekterdi kóbeıtýge múddeli ekenin baıqatqan. Bul boıynsha kásiporyn basshylarynyń esepteri tyńdalyp, olarǵa kóktemde egiletin tal-butalardyń sanyn eseleýi keregi eskertilgen. Ári sol jıynda «Beregınıa – Bıo» qorynyń jetekshisi Tatıana Ponomareva keńes múshelerine aǵashtardy kútý máselesi týraly eske saldy. Ol sońǵy ýaqytta qala aýmaǵyndaǵy jasyl jelekterdi sýarý jıiligi men sapasy boıynsha kóptegen shaǵym jınalyp qalǵanyn aıtyp, jasyl aýmaqta úsh jyldyq kútim jasaý ádisine qaıta kóshýdi usynǵan.
– Sońǵy jyldary baıqalǵan jaǵymsyz úrdis bar: qarjylandyrý kólemi jasyl aýmaqtardyń sanyna bólinedi de, kóshetterdi sýarý sany shyǵarylady. Alaıda sýarýdyń bul túri tipti tıimsiz ári aǵashtardy sýarý óńirde óte kesh bastalady. Sondyqtan onyń júıesin ózgertý kerek, – degen bıolog.
Sol joly zaýyttardaǵy ekologııa máselesine jaýapty tulǵalar bas shulǵyǵanymen, artynan bergen ýádelerin umytyp ketti me, sanıtarlyq aımaqtardaǵy suryqsyz jaǵdaı baıaǵy qalpynda qala berdi.
Jýyqta oblys ortalyǵyndaǵy ekologter kásiporyndardyń jasyl beldeýlerine monıtorıng júrgizip, tapsyrmalardyń oryndalmaǵanyna kóz jetkizdi. Egilgen jas aǵashtardyń basym bóligi ýaqtyly kútilmegendikten tamyr ala almaı, qýrap qalǵan. Negizi zaýyttar men kenishterdiń jyl saıynǵy ekologııalyq sharalarǵa bóletin qarajattary az emes. Myńdaǵan tal otyrǵyzylady. Alaıda olardy kútý, sýarý sharýalary baqylaýdan shyǵyp qalǵan. Iаǵnı josparly is-sharalar aıtarlyqtaı nátıje bermeı otyr. «EKOM» qoǵamdyq birlestiginiń jetekshisi Svetlana Mogılıýktiń aıtýynsha, kóptegen kásiporynnyń sanıtarlyq qorǵaý aımaǵynda otyrǵyzylǵan aǵashtardyń kúıi kóńil kónshitpeıdi.
– О́tken jyldyń jeltoqsan aıynda jáne aǵymdaǵy jyldyń qańtar aıynda aımaqtyq ekologııalyq keńes ótti. Jıynda biz kásiporyndardyń jasyl beldeýlerinde on myńdaǵan tal-terek otyrǵyzylǵanyn estidik. Aǵashtardyń jaǵdaıyn baǵalaý úshin pavlodarlyq ekologter arnaıy ádisteme ázirledik. Bizdiń bul usynysymyz keńes músheleri tarapynan maquldandy. Sondaı-aq jergilikti atqarýshy organdar barlyq kásiporyndarǵa kómek kórsetemiz dep mindet alǵan, –deıdi ekolog.
Mamannyń aıtýynsha, oblystyq ekokeńestiń tapsyrmasyna keıbir kásiporyndar men merdigerler muryn shúıirip qaraıdy. Ekologııalyq uıymdar eńbek uıymdaryna boratyp hat jazyp, jaǵdaıdy túzeýdi suraǵan eken. О́ńirge tanymal tórt kásiporyn qoǵamdyq uıymnyń jazbasha hattaryna múlde jaýap bermepti. Sondaı-aq olardyń qaı jerge jáne qansha aǵash otyrǵyzǵany týraly da aqparat joq. Bular – «Maıkýben Vest» JShS, «Maıqaıyń altyn», «Kaýstık» jáne «Kastıng» kásiporyndary.
«EKOM» qoǵamdyq uıymynyń hattaryna Ekibastuz GRES-1 stansasy men «Pavlodarenergo» AQ da jaýap bermegen. Monopolıster ekologtermen yntymaqtastyqtan bas tartyp, egilgen kóshetterdiń qaıda ornalasqanyn da kórsetpegen.
Degenmen kásiporyndardyń kópshiligi monıtorıng júrgizýge kómektesýge kelisipti.
«Monıtorıng nátıjeleri kórsetkendeı, Pavlodar munaı-hımııa zaýytyndaǵy jasyl jelekterdiń besten eki bóligi tamyrlanǵan. Teń jartysy qýrap qalypty. Al «Neftehım LTD» kásipornyna tıesili sanıtarlyq qorǵaý aýmaǵynda qýraǵan aǵashtardyń úlesi kem degende 20 paıyzdy quraıdy. Saý tal-terekter jalpy otyrǵyzylǵan jelektiń shamamen 10 paıyzdaıy ǵana. GRES-2 stansasynda tamyr almaǵan aǵashtar 40 paıyzdaı boldy. Osyǵan uqsas kórinis Aqsý ferroqorytpa zaýytynda da baıqaldy. Birlestik músheleri ol jerde «jansyz» aǵashtardyń 73 paıyzǵa deıin jetkenin anyqtady», dep qynjyldy «EKOM» QB jetekshisi.
Svetlana Mogılıýktiń paıymynsha, merdigerler kóshetterdi otyrǵyzý ornynyń erekshelikterin eskermegen. Topyraqtyń quramyna aldyn ala taldaý júrgizilmeı, aǵashtardy otyrǵyzý tehnologııasy buzylǵan. Kútim jasaýda da olqylyqtar jeterlik.
Qoǵam belsendileri atap ótkendeı, ázirge sanıtarlyq qorǵaý aımaǵyn kógaldandyrýmen aınalysatyn merdigerlerge qoıylatyn naqty talaptar joq. Sondyqtan da tıisti baqylaý júrgizilmeıdi. Jaqynda zań shyǵarýshy organdarǵa bul boıynsha arnaıy talaptardy bekitý týraly usynystar engizilipti. Bul usynystar merdiger kompanııalarǵa mindettemelerin oryndaý kezinde nusqaýlar berip, ekologııalyq máselelerdi sheshýge kómektespek.
Pavlodar oblysy
