Oblystyq polısııa departamentiniń baspasóz qyzmeti habarlaǵandaı, qaıǵyly oqıǵa 12 tamyzda túngi saǵat 2:00 shamasynda bolǵan.
«Aqtoǵaı aýdanynda Balqash – Gúlshat tasjolynda 65 jastaǵy Subaru avtokóliginiń júrgizýshisi joldaǵy eskertý belgileriniń baryna qaramastan, joldyń jóndelip jatqan baǵytyna shyǵyp, sol jerde jol jóndeýmen aınalysyp jatqan, 47 jastaǵy azamattyń basqarýyndaǵy Shacman júk kóligimen soqtyǵysqan. Jol-kólik oqıǵasynyń saldarynan Subaru avtokóliginiń júrgizýshisi men eki jolaýshysy oqıǵa ornynda qaza tapty», delingen habarlamada.
Atalǵan derek boıynsha Qazaqstan Respýblıkasy Qylmystyq kodeksiniń 345-baby 4-bóligine sáıkes sotqa deıingi tergeý amaldary bastaldy. Tıisti saraptamalar taǵaıyndaldy.
