Sırk – ǵajaıyp óner, ásirese ony balalar qyzyǵyp kóredi. Atalǵan baıqaý – búginde sırk ónerindegi bedeldi halyqaralyq festıvalderdiń birine aınaldy. Jyl sanap aýqymy artqan baıqaýǵa bıyl Fransııa, Italııa, Reseı, Belarýs, Majarstan, Vetnam, Izraıl, Qyrǵyzstan, Moldova, Mońǵolııa, Tájikstan, О́zbekstan jáne otandyq sırk óneriniń saıypqyrandary qatysyp, dúbirli dodanyń baıraǵyn kóterdi. Festıval barysynda kórermender Fransııa men Vetnamnan kelgen áıgili áýe gımnastarynyń ónerine tańǵalsa, tanymal qazaqstandyq atty-akrobatıkalyq ansambldiń oıyndary da óz ereksheligimen jurtshylyqty tánti ete bildi. Sondaı-aq sheber jonglerler, akrobattar, arqan boıymen júrýshiler men ekvılıbrısterdiń óneri de eshkimdi beıjaı qaldyrmady. Ásirese sırk kloýndarynyń qyzyqqa toly túrli is-qımyldaryna balalar dán rıza bolyp, kúlkige batty. Sonymen birge festıvalge qatysýshylar arasynda «shteın-trape» janrynyń úzdigi, ataqty áýe ekvılıbrısi Oleg Spıgınte óner kórsetip, kórermenderdiń yqylasyna bólendi. Aıta keteıik, bul jolǵy baıqaýdyń baǵdarlamasynda jyrtqysh ańdarmen óner kórsetý alynyp tastalǵan.
Halyqaralyq deńgeıdegi is-sharany uıymdastyrýdyń basy-qasynda júrgen «Astanalyq sırktiń» dırektory, Qazaqstannyń eńbek sińirgen qaıratkeri Erik Joljaqsynov óz sózinde bedeldi baıqaýdyń mańyzyna toqtaldy.
– «Azııa jańǵyryǵy» festıvaliniń máni de, mazmuny da bólek. Bul baıqaý elimizdegi sırk ónerin ǵana emes, elordany da álemge tanytýǵa óz úlesin qosty. Bir jaǵynan, sırk ártisterine shabyt beredi, jańa tynysyn ashady. О́ner adamy toqtap qalmaý kerek. Sol úshin osyndaı festıvalder óte qajet. Biz qazir ár elden kelgen ártisterdiń ónerin kórip, tájirıbe almasamyz. Sondaı-aq kóptegen memlekettegi áriptesterimizben shyǵarmashylyq baılanys qurdyq. Bizdiń negizgi kórermenderimiz – balalar. Keıde balalaryn ertip kelgen ata-analar sırkti kórip, tańǵalyp jatady. Negizi, ónerdiń ádemiligi – sırkte. Siz sırk ártisteriniń ónerin kórip, adam boıyndaǵy qabilettiń sonshalyq mol ekendigin túsinesiz, – dedi ol.
Al Reseı Federasııasynyń quramyndaǵy Saha respýblıkalyq memlekettik sırkiniń dırektory, qazylar alqasynyń múshesi Sergeı Rastorgýev festıvaldiń joǵary deńgeıde uıymdastyrylǵanyn aıtyp, óz rızashylyǵyn bildirdi.
– Bizdiń sırk teatrymyz toqsanynshy jyldardyń basynda ashylǵan. Sodan beri tynymsyz jumys istep, kóptegen baıqaýlarǵa qatysyp, laýreat atandyq. Negizi, Iаkýtsk qalasynda úsh júz myńnan asa halyq turady, sonshalyqty úlken dep aıta almaımyn. Sonda da biz qalamyzǵa sırk teatry kerek ekendigin dáleldeı bildik. Teatr ártisteri Beıjińde oqyp, ónerin shyńdap keldi. Biz de halyqaralyq festıval ótkizemiz, oǵan qazaqstandyqtar da qatysty. Eki óner ordasynyń arasynda áriptestik qana emes, dostyq baılanys ornaǵan. Maǵan «Azııa jańǵyryǵy» baıqaýy erekshe unady. Ásirese ár elden kelgen sırk ártisteriniń kórsetken baǵdarlamalary óte qyzyqty, anshlagpen ótip jatyr. Uıymdastyrýshylarǵa alǵysym sheksiz, – dedi festıval qonaǵy.
