Prezıdentke aldymen qyrkúıek aıynda ashylatyn Iаdrolyq medısına ortalyǵynyń dıagnostıka blogy tanystyryldy. Iаdrolyq medısına ortalyǵynyń iske qosylǵan kezde dıagnozyn qoıý qıyn qaterli isik aýrýlaryn, sondaı-aq kardıologııa jáne nevrologııa aýrýlaryn erte kezeńinde anyqtaıdy. Zamanaýı jabdyqtarmen qamtamasyz etilgen jańa ortalyqtyń qyzmeti – emdelýge joldama berilgen árbir qazaqstandyqqa ortaq.
Bul ortalyqtyń ereksheligi – qazirgi kezde álemdik medısına ındýstrııasynda qoljetimdi pozıtrondy emıssııalyq kompıýter tomografııasy. Skanerleý jyldamdyǵy joǵary bul apparat dıagnoz qoıý sapasyn arttyrady. PET/KT zertteýinen ótetin pasıentterdiń sanyn jylyna 3 myńnan 7 myńǵa deıin arttyrady. Mamandardyń aıtýynsha, qazirgi ýaqytta bul apparattyń Ortalyq Azııa men TMD elderinde balamasy joq.
Qasym-Jomart Toqaevqa sıklotrondy-óndiristik keshen men dıagnostıkalyq bloktan turatyn biregeı Iаdrolyq medısına ortalyǵynyń basqa da múmkindikteri týraly baıandaldy. Atap aıtqanda sıklotrondy keshen arqyly 9 radıofarmpreparat óndirisine jol ashylmaq. Qazaqstanda bul preparattardyń segizi buryn óndirilmegen.
Memleket basshysy jańa emdeý-dıagnostıkalyq blokty aralap kórdi. Bul jerde kúrdeli aýrýlarǵa shaldyqqan naýqastardy emdeý men ońaltýdyń tásilderi arqyly 7 terapııalyq bólimshe jumys isteıdi.
Prezıdent dárigerlermen jáne ǵalymdarmen pikirlesip, Iаdrolyq medısına ortalyǵynyń qyzmeti búkil elimiz úshin aıtýly oqıǵa bolatynyn atap ótti. Qasym-Jomart Toqaev ortalyq qyzmeti azamattardyń densaýlyǵyn jaqsartýǵa jáne qazaqstandyqtar úshin zamanaýı medısınalyq tehnologııalardyń qoljetimdiligin arttyrýǵa qyzmet etetinine senetinin jetkizdi.
