Jazýshynyń beınesin aınytpaı jasaǵan. Áınektiń astynda saqtalǵan. Jaqtaýy – aǵash. 1982 jyly jazýshynyń 80 jyldyǵyna qyzylordalyq ini-dosy Orazǵalı Erekeshev tartý etken. «Ákemdeı bolyp ketip edi» degen esteliginde («Ǵabıt Músirepov týraly estelikter», 2004) ol Ǵabeńmen alǵashqy tanystyǵy (1958 j.), qalamgerdiń Aral óńirine sapary, osy saparynan keıin teńizdiń bolashaǵyna qatysty «Pravda» gazetine maqala jazǵanyn atap ótedi. Al keıinirek «Alpys tórt myń sharshy kılometr jerdi alyp jatqan teńiz túpterdiń túbinde qurǵap qalar bolsa, odan boraıtyn tuzdy shań qansha dúnıeni búldiretinin kim bilsin!» («Qazaq ádebıeti»,11.09.1981), – dep alańdaýshylyq tanytqanyn jazady. Kóp adamǵa syr asha bermeıtin Ǵabeń ózinen 25 jas kishi Orazǵalıdy Almatyǵa úıine qonaqqa shaqyryp, qazaqtyń zııaly qaýymymen tanystyryp, jaqyn aralasyp ketedi. Orazǵalı Araldyń jaǵasyna kıiz úı tiktirip, Ǵabeńdi birneshe ret qonaq qylady. El adamdarymen tanystyryp, áńgime-dúken qurýyna jaǵdaı jasaıdy. Almatyǵa shubat jetkizip turady. Oǵan 1971 jyly Ǵabeń ózi minip júrgen «Gaz-69» mashınasyn syıǵa tartady. Jyl saıyn Almatyǵa shaqyryp, «aýnap-qýnap demalyp qaıt» dep, kelgen saıyn qarjylaı kómek berip: «...jaqsylap demal, turǵan jeriń apat, qaıbir densaýlyqtaryń myqty edi senderdiń», – dep qamqorlyq tanytyp otyrǵan. O.Erekeshov sóz zergerine degen óziniń erekshe qurmetiniń bir belgisi retinde 80 jyldyǵyna arnaıy tapsyryspen kúrishten portretin salǵyzyp, syılaıdy. Bul kúnde portret Mýzeı kesheniniń qorynda saqtaýly.
Rashıda OTAROVA,
Mýzeı kesheniniń ǵylymı qyzmetkeri
