«Ispanııa Výeltasynyń» 87 jyldyq tarıhy bar. Alǵash ret ol 1935 jyly uıymdastyryldy. Bul jarysta eń kóp oljaǵa kenelgen – Roberto Eras Ernandes. Ispanııanyń Salamanka qalasynyń týmasy 2 000 jáne 2003-2005 jyldary tórt ret bas júldeni oljalady. 2006 jyly Pıreneı túbeginde «Astana» klýbynyń múshesi Aleksandr Vınokýrovtyń keremet óner kórsetkeni barsha jankúıerdiń jadynda. Qazaqstandyq veloshabandoz atalǵan básekeniń úsh kezeńinde shashasyna shań juqtyrmaı, aqyry jalpy esepte bas júldeni oljalady. Sol maýsymda taǵy bir otandasymyz – Andreı Kashechkın de asqan sheberlik tanytyp, úshinshi oryndy ıelengen edi. Sondaı-aq 2008 jyly «Astananyń» sapynda óner kórsetken ıspanııalyq legıoner Alberto Kontador da qarsylasqa shaq keltirmedi.
2019-2021 jyldary jalaýy jelbirgen sońǵy úsh jarys Nıderlandta irgetasy qalanǵan «Jumbo-Visma» klýby sapynda óner kórsetip júrgen 32 jastaǵy Slovenııanyń sańlaǵy Prımoj Roglıchtiń aıqyn jeńisimen aıaqtaldy. 2019 jyly ol sheshýshi tusta Alehandro Valverde (Ispanııa) men Tadeı Pogachardan (Slovenııa) ozsa, 2020 jyly Marks Soler (Ispanııa) men Danıel Martındi (Irlandııa) artqa tastady. Byltyrǵy maýsymda Roglıchten keıingi oryndardy Enrık Mas (Ispanııa) pen Djek Heıg (Aýstralııa) ıelendi.
Bıylǵy jyly «Astana» klýbynyń namysyn qazaqstandyq Alekseı Lýsenko, Vadım Pronskıı, Evgenıı Fedorov, ıtalııalyq Vınchenso Nıbalı men Samýele Battıstella, kolýmbııalyq Mıgel Anhel Lopes pen Harold Tehada jáne ıspanııalyq Davıd De La Krýz syndy saqa sportshylar qorǵaıdy.
