Qazaqstannyń aýyr atletteri óz jankúıerlerin taǵy bir qýantty. Bul joly asa aýyr salmaqta kúsh synasqan Aızada Múptilda tamasha óner kórsetti. Qossaıystyń qorytyndysy boıynsha 266 (116+150) kılolyq ziltemirdi eńsergen ol altynnan alqa taǵyp qana qoımaı, osy oıyndardyń rekordyn jańartty. Dál osy salmaqta óner kórsetken taǵy bir jerlesimiz – Lıýbov Kovalchýk kúmis medaldi moınyna ildi. Onyń nátıjesi – 261 (114+147) kılo. Al onyń aldynda ǵana 102 kılo salmaqta saıysqa túsken Artem Antropov ta (96 kılo) ekinshi orynǵa turaqtady. Osylaısha, osy sport túrin serik etken órenderimiz barlyq jattyǵý túrlerin qosa eseptegende 8 altyn, 15 kúmis jáne 3 qola medaldi ıelendi.
Dzıýdoshylar da óz beldesýlerin bastap ketti. Otandastarymyzdyń arasynan alǵashqy bolyp tatamıge shyqqan Qanat Seıilhan (60 kılo) qola júldeni enshiledi. Jalpy, osy jarysqa bizdiń balýandar myqty quramda attandy. Sol sebepti de aldaǵy ýaqytta tatamı sheberleri qorjynymyzdy taǵy birneshe medalmen tolyqtyrady degen úmit bar.
Keshe 100 metrge brass ádisimen júzýde Adelaıda Pchelınseva qola medal enshiledi. Márege 1 mınýt 11,08 sekýndta jetken ol qos túrkııalyq – Vıktorııa Zeınep Gıýnesh pen Hazal Okannan ǵana qalyp qoıdy. Osydan birer kún buryn batterflıaı ádisimen júzýde eń qysqa qashyqtyqta saıysqa túsken Pchelınseva bas júldeni oljalaǵan bolatyn. 50 metrlik brass saıysynda Ksenııa Ignatova da úshinshi orynǵa taban tiredi.
Jalpy esepte jarys qojaıyndary jeke-dara kósh bastap tur. Túrkııalyqtardyń qorjynynda 265 (106 altyn+89 kúmis+70 qola) júlde bar. 121 (43+30+48) medal oljalaǵan О́zbekstan quramasy ekinshi orynǵa kóterildi. Iran úshinshi satyǵa syrǵyp tústi. Parsy eliniń ókilderi 116 (37+35+44) júldege ıelik etýde. Tórtinshi oryndaǵy Ázerbaıjan 71 (22+28+21) medaldi enshileýde.
