Túrkııa tym uzap ketti

Qazaqstannyń kıkboksshy­larynyń dańqy alysqa jaıyl­ǵanyn barsha jurt jaqsy bi­ledi. О́tken ǵasyrdyń toqsa­nyn­­shy jyldarynyń basyn­da bul ónerdi bizdiń elge áke­lgen Sabyrjan Mahmetov edi. Sań­laq Sabyrjannyń tu­syn­da jerlesterimizdiń baǵyn­dyr­maǵan belesteri joq. Sol úr­dis kúni búginge deıin jalǵa­sýda. Osy Islamıadada úsh bir­deı saıypqyranymyz jeńis tu­ǵyrynyń eń bıik satysyna kóterildi. Olar – Nursultan Ju­ma­baev (51 kılo), Alıhan Oz­doev (67 kılo) jáne Maqsat Úsipov (71 kılo). Bul sportshylar­dyń barlyǵy da qarsylastaryn aıqyn basymdyqpen utty. Al 81 kılo salmaqta synǵa túsken Rýslan Stepanov kúmis medaldi ıelendi.

Karateshiler saıysynda Qaısar Alpysbaıdyń qarqynyna eshkim shydaı almady. Kóptegen halyqaralyq jarysta júlde alyp júrgen qandasymyz bul joly da óz jankúıerlerin jerge qaratqan joq. Qarsy kelgenderdi qoǵadaı japyrǵan Qaısar 60 kılo salmaq dárejesiniń bas júldesin qanjyǵasyna baılady. Fınalda ol kýveıttik Abdolla Shaabandy shań qaptyryp ketti. Saýdııalyq Saýd Albısher men aljırlyq Helass Aıýb úshinshi orynǵa taban tiredi.

Júzýshilerdiń jarysynda taǵy da Ádilbek Mýsın jasyndaı jarqyldady. 50 metrge batterflıaı ádisimen júzýde aldyna jan salmaǵan ol altyn tuǵyrǵa kóterildi. Buǵan deıin Ádilbek osydan eki ese uzyn qashyqtyqta da bas júldeni oljalaǵan edi. 4h100 metrlik aralas estafetada quramynda Ksenııa Ignatova, Adelaıda Pchelınseva, Danıela Dıýval jáne Sofııa Ábýbákiro­va bar Qazaqstan quramasy kúmis medal oljalady. Dál sol qashyq­tyqta erlerimiz qolaǵa qol sozdy. Bul komanda sapynda Egor Popov, Aıbek Qamzenov, Ádilbek Mýsın jáne Aleksandr Varakın óner kórsetti.

Jalpy esepte Túrkııa qura­masy alda keledi. Jarys qoja­ıyndarynyń qorjynynda 303 (127 altyn+97 kúmis+79 qola) júlde bar. О́zbekstan quramasy endi ekinshi oryndy eshkimge ­bere qoımas. Olar 140 (46+38+56) medaldi oljalaýda. Iran úshinshi satyǵa turaqta­dy. Parsy eliniń ókil­deri 127 (38+41+48) júldeni en­shiledi. Tórtinshi orynda – Ázer­baı­jan. Olar 85 (26+30+29) medaldi ıemdendi. Úzdik bestikti Qazaq­stannyń sportshylary tú­ıin­deýde. Otandastarymyzdyń qor­jynyna 80 (24+22+34) júlde tústi.