Úzdik segizdiktiń saıysy shırek fınaldan bastaldy. Bul týrnırde qazaqstandyq Artem Reznıkov te (30 kezdesý, 23 jeńis, 17 nokaýt) óner kórsetýde. Onyń janama aty – «Spartak». «Alash Praıd» klýby sapyndaǵy Shyǵys Qazaqstan oblysyndaǵy Rıdder qalasynyń týmasy tusaýkeser kezdesýinde kezinde UFC pen Bellator syndy beldi uıymdarda aıqasqan brazılııalyq Davı Ramosty (14 kezdesý, 10 jeńis, 8 nokaýt) upaı sanymen utyp, jartylaı fınalǵa joldama aldy. Bul mejede Artem daǵystandyq Rashıd Magomedov (32 kezdesý, 25 jeńis, 10 nokaýt) pen cherkes Álı Bagov (43 kezdesý, 31 jeńis, 24 nokaýt) arasyndaǵy kezdesýdiń jeńimpazymen kúsh synasýǵa tıis edi. Alaıda osydan birer apta buryn olar oktagonǵa shyqqanymen, bir-birine soqqy jumsamaı, kórermenderdi ábden mezi etti. Soǵan qatty narazy bolǵan ASA promoýsheniniń qojaıyny Maırbek Hasıev ekeýin de jarystan shettetti.
Dál qazirgi kezde atalǵan uıymnyń jetekshileri osy jarysta baq synaýǵa laıyq sportshylardyń kandıdatýrasyn qarastyrýda. MMA.Metaratings.ru saıty taratqan málimetke súıensek, úmitkerler qatarynda Daýd Shaıhaev, Aýrel Pırtea jáne Pavel Gordeev syndy tanymal faıterler bar. Olardyń esimderi jankúıerlerge jaqsy tanys. Atap aıtsaq, cheshenstandyq Shaıhaev aralas jekpe-jekten 17 kezdesý ótkizip, 13 ret jeńiske jetti. Toǵyz básekeni merziminen buryn aıaqtady. Rýmynııalyq Pırtea 35 aıqastyń 23-in óz paıdasyna sheship, 18 márte aıqyn basymdyqqa ıe boldy. Túmendik Gordeev 24 kezdesýdiń tek úsheýinde ǵana utyldy. Ol jeti qarsylasyn nokaýtqa jiberdi. Mine, osy sportshylardyń biri jartylaı fınalda bizdiń Artem Reznıkovpen aıqasýy múmkin.
