Qazaqstan úzdik bestiktiń qatarynda

Jarystyń sońǵy kúni karateden +61 kılo salmaq dárejesinde kúsh synasqan Sofııa Berýlseva Qazaq eliniń Ánuranyn shyrqatty. Tokıo Olımpıadasynyń qola júldegeri jáne Dúnıejúzilik oıyndardyń jeńimpazy degen ataǵy bar jerlesimiz Konıada bas júldeni oljalady. 61 kılo salmaqtaǵy Ásel Qanaı qolaǵa qol sozdy. Ol tek ózbekstandyq Zýlhýmor Týrsynalıeva men túrkııalyq Gýlbanar Gezıýtoktan ǵana qalyp qoıdy. Taǵy bir qolany týnıstik Vefe Manjýb enshiledi.

Sporttyq gımnasshylar saıy­synda Aıda Baýyrjanova erkin jattyǵýda altyn, tomarda kúmis jáne bórenede qola medaldi ıe­lendi. Osyǵan deıin 3 altyn, 1 kúmis jáne 1 qola medaldi qor­jynǵa salǵan kıkboksshylar taǵy da óz jankúıerlerin qýant­ty. Bul joly loý-kıkten Berik Ysqaqov (63,5 kılo) qarsylas shaq keltirmese, Nurdáýlet Qalshora men Shara Hamzına úshinshi orynǵa taban tiredi.

Jekelegen sportshylar arasynan Renata Sultanovanyń asqan sheberligine tánti boldyq. 24 jastaǵy veloshabandozymyz atal­ǵan jarysta úsh ret altynnan alqa taqty. Ol jeke saıysta, skretchte jáne omnıýmda aldyna jan salmady. 50 jáne 100 metr­ge batterflıaı ádisimen júzgen Ádilbek Mýsınniń de mereıi ústem boldy. 400 metrlik qashyqtyqty 44,94 sekýndta júgirip Mıhaıl Lıtvın Qazaqstannyń rekordyn jańartty. Aýyr atletter saıy­synda Aızada Múptilda qos­saıystyń qorytyndysy boıyn­sha 266 (116+150) kılolyq zil­te­mirdi eńserip, jeńis tuǵy­ry­nyń eń bıik satysyna kóterildi. Bul – Islamıadanyń rekordy!

Joǵaryda esimderi atalǵan sańlaqtardan bólek, júzýshi So­fııa Ábýbákirova (50 metr, bat­terflıaı) men Adelaıda Pche­lınseva (50 metr, brass), ve­lo­trekshi Áli­sher Jumahan (jeke saıys) men Artıom Zaharov (omnıým), gımnasshylar Aıda Ba­ýyrjanova men Eljana Tánıeva, karateshi Qaı­sar Alpysbaı, ziltemirshi Arlı Chonteı men Zúl­fııa Chın­shanlo, áıelder kúresiniń sheberi Elena Shalygına men sport­tyń keıbir túrleri boıynsha ótken komandalyq básekede otandastarymyz altyn alyp, barsha jankúıerdi qýantty. Sondaı-aq komanda qorjynyn kúmis jáne qola medaldarmen toltyrǵan basqa da sportshylarymyzǵa aı­­­tar alǵysymyz sheksiz. Bul ja­rys­ta barlyǵy 125 órenimiz sport­­tyń 16 túri boıynsha baq synady.

Jalpy esepte Túrkııaǵa teń keler eshkim bolmady. 341 (145-107+89) júlde oljalaǵan jarys qojaıyndary jarys kestesinde jeke-dara kósh bastady. О́z­bekstan ekinshi oryndy ıelendi. Kórshilerimiz 158 (51+42+65) medal enshiledi. Úshinshi orynda – Iran. Parsy eliniń ókilderi 133 (39+44+50) júldege qol jetkizdi. Tórtinshi satyǵa jaıǵasqan Ázer­baıjannyń qorjynynda 99 (29+36+34) júlde bar. Besinshi orynda – Qazaqstan. Sondaı-aq TOP-10 komandanyń qataryna Marokko (15+13+34), Indonezııa (13+14+29), Bahreın (9+7+7), Qyrǵyzstan (8+8+15) jáne Aljır (7+12+23) quramalary endi. Islamıadada barlyǵy 18 memlekettiń ánurany shyrqalyp, 34 eldiń týy kókte jelbiredi.

Anadoly elinde «Qazaqstan quramasy tabysty óner kórsetti me, álde bul nátıjege kóńilimiz tolmaı ma?» degen saýalǵa jaýap alý úshin buǵan deıingi jarys­tardyń nátıjelerine zer salǵan jón. Islam yntymaqtastyǵy oıyndarynyń tusaýy 2005 jy­ly Saýd Arabııasynda kesildi. Mekke, Medıne, Jıdda jáne Taıf qalalarynda uıymdastyrylǵan dodada jerlesterimiz 27 (13+8+6) júlde alyp, jalpy esepte úshin­shi oryndy oljalady. Biz tek saýdııalyqtar men my­syr­lyqtardan qalyp qoıdyq. Ekinshi jarystyń jalaýy 2009 jyly Irannyń bas shahary – Tegeranda jelbireýge tıis edi. Biraq saıası jaǵdaıǵa baılanys­ty ótpeı qaldy. Úshinshi Is­la­mıadany Indonezııanyń Aalem­bang qalasy qabyldady. Ońtús­tik Sýmatra aralynda ótken dúbirli dodaǵa qazaqstandyqtar qatysqan joq. 2017 jylǵy jarystyń shymyldyǵy Ázerbaıjannyń as­tanasy – Bakýde túrildi. Kaspıı teńiziniń arǵy jaǵalaýynda otan­dastarymyzǵa 19 (2+5+12) júlde buıyrdy. Eki altyndy da biz boksshylar saıysynda jeńip aldyq. Nátıjesinde, 14 orynǵa tu­raqtadyq. Mine, osy derek­terdiń ózderi-aq bıylǵy Islam yn­tymaqtastyǵy oıyndarynda Qa­zaqstan quramasynyń sátti óner kórsetkenin anyq ańǵartyp tur.