Osyǵan oraı ata-analar men balalar úshin elorda ákimdiginiń qoldaýymen «QazExpoCongress» ulttyq kompanııasynyń uıymdastyrýymen EXPO halyqaralyq kórme ortalyǵynyń alańynda balalar taýarlarynyń «KIDS EXPO. Balalar álemi» atty birinshi qalalyq kórme-jármeńkesi ótti. Premer-Mınıstrdiń orynbasary Eraly Toǵjanov balalar taýarlarynyń alǵashqy «Kids EXPO. Balalar álemi» kórme-jármeńkesine baryp, kórme-jármeńkede usynylǵan taýarlardyń assortımentimen jáne qunymen tanysty.
Vıse-premer mundaı kórme-jármeńkeler ata-analarǵa balalaryn aldaǵy oqý jylyna daıyndaý úshin óte yńǵaıly ekenin, usynylǵan assortıment qoljetimdi baǵamen satylyp jatqanyn atap ótti. 30-ǵa jýyq kompanııa óz ónimderin 30%-ǵa deıin tómen baǵamen usyndy.
Eraly Toǵjanov kórmemen tanysý barysynda memlekettik organdarǵa barlyq óńirde osyndaı formatta jármeńkeler uıymdastyrýdy tapsyrdy. Eki kúnde balalar taýarlarynyń «KIDS EXPO. Balalar álemi» jármeńkesine kelýshiler sany 20 myńnan asty. Uıymdastyrýshylar jármeńkeni jyl saıyn ótkizýdi josparlap otyr.
«KIDS EXPO. Balalar álemi» jármeńkesi EXPO halyqaralyq kórme ortalyǵynda 17-21 tamyz aralyǵynda saǵat 12:00-den 21:00-ge deıin jalǵasty. Bul kitap, keńse, toqyma, bilim berý jáne oıyn-saýyq ındýstrııasy, balalar men olardyń ata-analaryna arnalǵan taýarlar men qyzmetter ókilderin bir alańda biriktirýge múmkindik bergen alǵashqy iri qalalyq joba. Kórmeniń negizgi baǵyty – bilim berý, hobbı, demalys, balalar mádenıeti (jýrnaldar, kitaptar jáne mýzyka), oıyndar álemi (oıynshyqtar, oıyndar jáne qolóner), balalar sáni men kıimderi, kerek-jaraqtar men aksessýarlar jáne taǵy basqalar. 5 kún ishinde jergilikti taýar óndirýshilerdiń, kompanııalar men iri brendterdiń 100-ge jýyq qatysýshysy óz ónimderin eń qolaıly baǵamen usyndy. Jármeńkege Marwin, Abdi, FasTracKids, Utaria, CAES, Robotek, Foliant, «Almaty kitap» basylymdary jáne basqa da iri brendter qatysty.
«Bıyl birinshi ret ótkenine qaramastan jármeńke kelýshiler tarapynan suranysqa ıe bolyp jatyr. Osyndaǵy 93 kásipker kompanııanyń 28-i áleýmettik baǵa ornatýǵa kelisip, naryqtaǵy baǵadan 10-20 paıyzǵa arzan satyp otyr. Bas qaladan bastaý alǵan jármeńke jumysyn odan ary jalǵastyrý úshin ózge óńirdegi ákimdiktermen, kásipkerlermen túsindirý jumystary júrgizilýde. Bir qýantarlyǵy, osyndaı kórme-jármeńke ótkizý úshin kúni keshe elordadaǵy «Ásem» saýda úıiniń ákimshiligi habarlasyp, jabyq ǵımarattaǵy 320 sharshy metr alańdy qazan aıyna deıin tegin beretinderin jetkizdi. Osy boıynsha kásipkerlermen sóılesip jatyrmyz», dedi Nur-Sultan qalalyq Investısııalar jáne kásipkerlikti damytý basqarmasy basshysynyń orynbasary Erkeǵalı Kárbozov.
Jármeńke ashylǵan kúni kórme ortalyǵynyń alańynda «Astana» estradalyq-sımfonııalyq orkestriniń, bı ujymdarynyń, «Vaınah» ansambliniń óner kórsetýi, dereksiz keskindeme, ulttyq oıyndar (asyq atý, toǵyzqumalaq) boıynsha sheberlik synyptary, sondaı-aq Qazaqstan quramasynyń oıynshysy jáne «Astana» basketbol klýbynyń kásibı sheberlik forvardy Rýslan Aıtqalıdyń basketboldan sheberlik synyby ótti.
«Bizdiń kompanııa Qazaqstan naryǵynda 13 jyldan beri jumys isteıdi. Negizgi jumysymyz – bilim ordalaryna ınnovasııalyq sheshim usyný. Ol jerde balabaqshadan bastap mektepterge deıin qamtylady. Bizdiń «Intellectum» degen oıyndarymyz bar. Bul balanyń kreatıvti oılanýyna, toppen jumys isteı bilýine, tústerdi dálme-dál ajyrata bilýine kóp kómektesedi. Balalardyń logıkasyn damytatyn balabaqsha jáne bastaýysh synyp balalaryna arnalǵan oıyndar jıyntyǵy tolyqtaı avtorlyq metodıkamen jumys isteıdi. Qazirgi tańda, Qazaqstan boıynsha 300-ge jýyq balabaqshaǵa bizdiń metodıkamyz engizilgen. Sonymen qatar robottehnıkaǵa baılanysty birneshe jobamyz bar. Biz osyndaı kórme-jármeńkege qatysqanymyzǵa qýanyshtymyz, ári qaraı jalǵasyn taba berse eken», deıdi PINE holdıng kompanııasynyń korporatıvtik menedjeri Arman Baıgaskın.
Jalpy jármeńkede 18 aqparattyq, 22 mádenı jáne 22 sporttyq is-shara, sondaı-aq 20 ART sheberlik sabaǵyn ótkizdi. Jıyny 80-nen astam is-shara ótkizildi.
