Rotasııa qaǵıdaty: 29 mekteptiń dırektory aýysty

Jambyl oblysynda 361 orta, 33 negizgi jáne 50 bastaýysh mektep bar. Búgingi tańda atalǵan mektepterdiń 29-nyń dırektory rotasııa tártibine saı aýys­tyryldy. Basqa mekteptiń dırektory qyzmetine kiriskenderdiń basym bóligi Taraz qalasyndaǵy tis qaqqan mamandar. Bylaısha aıtqanda, bir mek­tep­ti uzaq ýaqyt basqaryp, azdy-kópti «dıktatorǵa» aınala bastaǵan basshylar desek te bolady.

Kezinde mınıstr dál osy rotasııalaý tártibiniń bilim berý uıymdaryndaǵy jumysty jańa deńgeıge kóteretinine senim bildirgen bolatyn. A.Aımaǵambetov bul úrdis bilim berý uıymdary jumy­sy­nyń tıimdiligin arttyratynyna, birin­shi basshylardyń basqarýshylyq biliktiligin kásibı turǵydan damytatynyna senim bildirgen edi. Jalpy, rotasııa degenińiz bir ákimshilik aýmaqta ǵana júrgizilgendikten, onyń áseri qan­daı bolatynyn ýaqyt kórsete jatar. Bir anyǵy, oblys ortalyǵyndaǵy dı­rek­torlardyń jumys isteý tártibin muǵalimder jaqsy biledi. О́ıtkeni bári bir-birimen jaqsy tanys. Sondyqtan ár dırektor jumys isteý modelin Jańa Qazaq­stannyń kózqarasyna sáıkes ja­ńa­shalamasa, óziniń múmkindigin jańa baǵyttarmen reformalamasa, bári beker sekildi. О́ıtkeni olar alysqa ketip bara jatqan joq...

«О́ńirde 443 mektep bar bolsa, onyń ishinde 29 mekteptiń dırektory osy jyly rotasııa qaǵıdatyna sáıkes basqa mekteptiń dırektory qyzmetine kiri­setin boldy. Odan bólek mektepke deıingi uıymdardyń jetekshileri de aýystyrý tártibine sáıkes basqa qyz­met­terdi atqarmaq. Olardyń sany – 30. Jalpy alǵanda, mınıstrlik bekit­ken qaǵıdatqa sáıkes bir bilim berý uıymynda jeti jyldan astam ýaqyt basshylyq qyzmet atqarǵan dırektorlar rotasııaǵa tústi. Jalpy, bul jumys mektepterdiń kórsetkishine, bala sanyna, bilim berýdegi jańashyldyǵyna saı júzege asyryldy. Basqa qyzmetke aýysqan basshylardyń basym bóligi Taraz qalasyndaǵy dırektorlar bolyp otyr», deıdi oblystyq bilim basqarmasy pedagog kadrlarmen jumys bóliminiń bas mamany Qarlyǵash Qonysbekova jaǵdaıdy tolyqtaı túsindirip.

Bilim basqarmasynyń ókili keltirgen derekterge súıensek, Talas, Merki, Sa­ry­sý, Qordaı aýdandarynda eki mek­teptiń dırektory qyzmet aýystyrsa, Shý aýdanynda bes mekteptiń dırektory endi jańa bilim berý mekemesin basqarmaq. Qalǵan aýys-túıister Taraz qalasyn qamtyǵan. Bylaısha aıtsaq, aýys-túıistiń jartysynan astamy oblys ortalyǵynda oryn alǵan. Rotasııaǵa túsken dırektorlardyń ishinde bir qyz­met­ti 18 jylǵa jýyq ýaqyt atqarǵan maman da bar.

Mınıstrlik bekitken qaǵıdatqa sáı­kes atqarylatyn rotasııalaý jumy­sy toqsan saıyn jalǵasyn tappaq. Q.Qonys­bekovanyń aıtýynsha, osy jyldyń aıaǵyna deıin taǵy úsh mekemeniń basshysy aýysady. Sondaı-aq 16 mektepke deıingi bilim berý uıymynyń basshysy jańa orynda jumysqa kirispek. Budan soń kelesi jyldyń jaǵdaıy zerdelenbek.

Ádette basshylar aýysqan kezde ko­man­dalyq aýys-túıis oryn alyp jatatyny málim. Bul jaǵdaı bilim salasynda da qaıtalanbasyna kim kepil? Basshy myqty degen kadrlardy ózimen birge er­tip ketýi múmkin be? Osy saýaldy ob­lys­tyq bilim basqarmasynyń mamanyna qoıǵan edik.

«О́ńirimizdegi jumystar mınıstrdiń tap­syrmasyna sáıkes júrgizilip jat­qanyn aıta ketken lázim. A.Aımaǵam­betovtiń ózi komandalyq aýys-túıis bolmaýy keregin shegelep tapsyrǵan bolatyn. Basshylar orynbasaryn, bas býhgalterin ózimen ertip ketpeýi kerek. Basqa da mamandardy shubyrtyp áketýine tyıym salynady. Bul jaǵdaıdy mektep dırektorlaryna qatań eskerttik. Sondyqtan jańadan taǵaıyndalǵan dırektorlar ózi basshy bolǵan mekemedegi qyzmet­kerlermen tyǵyz qarym-qaty­nas­ta jumys isteıtin bolady. Biz bul máseleni qatań qadaǵalaımyz», deıdi ol.

Rotasııa tártibi nelikten aýdandarda laıyqty deńgeıde júrgizilmegen? Nege Taraz qalasynda ǵana kóptegen basshy aýysqan? Aldymen oıymyzǵa osy saýal oraldy. Alaıda basqarmadaǵy mamandardyń aıtýynsha, rotasııa tártibi jalǵyz mektebi bar eldi mekenderdi qamtymaıdy. Sol sebepti basqa mektepke aýysqan dırektorlardyń basym bóligi Taraz qalasyn qamtyp otyr. Bálkim, aldaǵy ýaqytta osy másele mınıstrlik deńgeıinde qaıta qaralýy kerek shyǵar?

Rasynda da, Jambyl oblysynda Moıynqum aýdanynda ǵana keıbir eldi mekenderdiń araqashyqtyǵy 180-250 sha­qyrymdy quraıdy. Basqa aýdan­dar­daǵy aýyldardyń arasy aıtar­lyqtaı alys emes. Al keıbir eldi mekenderde tapjylmaı otyrǵan dırek­tor­lardyń basqa qyzmetke aýyspaýy atalǵan mektepterdegi júıeniń ózger­meı­tinin aıqyndaı tússe kerek. Osy másele eskerilse deısiń. Ásirese arasy 5-10 shaqyrymdy ǵana quraıtyn mektepterdiń dırektorlary aýysqannan eshkim utyla qoımas. Birinshi kezekte ujymdaǵy jumysty júrgizý, bilim berý isindegi prosester ózgeredi. Qalaı bolǵan kúnde de jańa basshy kelgen jerde jumys jańasha sıpat alady ǵoı. Rotasııa qaǵıdatynda osy máseleniń eskerilmegeni qapalandyrady.

«Mınıstrlik tarapynan arnaıy buı­ryq bolsa, aýyldardaǵy dırektorlardy aýystyrýǵa bolady. Ázirge jalǵyz mektebi bar eldi mekenderdegi basshylardy aýystyrý máselesi qaralmaǵan. Negizi osy másele qamtylsa eshkim utyl­maı­dy», deıdi mamandar.

О́ńirdegi mektep dırektorlarynyń basym bóligi – názik jandylar. Sońǵy derekterge zer salsaq, búginde 282 dırekter áıel bolsa, 121 basshy er azamat eken.

Jambyl oblysy