Oqıǵa 24 tamyz kúni túnde Túrksib aýdanynda bolǵan.
«Bizge túngi saǵat ekide kámeletke tolmaǵan qyz túsik tastaǵany týraly qońyraý kelip tústi. Ol qaladaǵy aýrýhanalardyń birine jatqyzyldy. Dárigerlermen sóıleskennen keıin men oqıǵa ornyna baryp, tekserýdi jón kórdim. Basyma bala qaıda degen suraq keldi. Qyzdyń anasynan oqıǵaǵa deıin qyz syrttaǵy dárethanada biraz ýaqyt bolǵanyn bildim. Dárethana ishinen qan izderin taýyp, ishinde jatqan balany kórdim. Ol dem alyp jatty. Osy kezde tergeý-jedel toby keldi, onyń quramynda krımınaldyq polısııa bóliminiń jedel ýákili Ǵazız Hamasqalıev boldy. Biz dárethananyń edeninen taqtaılardy tez alyp tastadyq. Áriptesim Ǵazız tómen túsip, balany qyzmettik kóılegine orap, abaılap shyǵaryp aldy. Sol kezde náreste jylady. Bárimiz ýaıymdadyq. Balany tez arada dárigerlerge tapsyrdyq», dedi Túrksib aýdandyq PB-nyń kámeletke tolmaǵandar isi jónindegi ýchaskelik ınspektory Nurjan Shatýnov.
17 jastaǵy jasóspirimniń anasynyń aıtýynsha, ol qyzynyń júkti bolǵanyn bilmegen. Qazirgi ýaqytta bul derek boıynsha Túrksib aýdandyq PB-na qarasty polısııa bóliminde tergeý amaldary bastaldy. Oqıǵanyń mán-jaıy anyqtalyp jatyr.
«Qazir balanyń jaǵdaıyn bilip qaıttyq. Ol dárigerlerdiń baqylaýynda jansaqtaý bóliminde jatyr. О́z betinshe dem alyp jatyr. Bul jańalyqqa balany qutqarýǵa qatysqan barlyq áriptesterim qatty qýandy. Demek bala ómir súredi. Ol týǵannan beri óz ómiri úshin kúresti. Oǵan zor densaýlyq, uzaq ǵumyr tileımiz. Baqytty bolyp óse bersin. Men úsh uldyń ákesimin. Sondyqtan bul oqıǵa meni beı-jaı qaldyrmady. Biz óz áriptesterimizben birge qutqarylǵan náresteniń taǵdyryn mindetti túrde qadaǵalaımyz», dedi Shatýnov.
