25 tamyzda Rıgada orys tildi qoǵamdastyqtyń narazylyǵyna qaramastan, Keńes Armııasynyń jaýyngerlerine arnalǵan Jeńis saıabaǵyndaǵy eskertkishti bólshekteý aıaqtaldy. 79 metrlik memorıaldyq keshenniń sońǵy elementi buzyldy. Atalǵan eskertkishti bólshekteý úsh kúnge sozylǵan. 23 tamyzda úsh jaýyngerdiń músinderi alynyp tastalynyp, 24 tamyzda áıel fıgýrasy bólshektelgen.
Jeńis saıabaǵyndaǵy bul memorıaldyq keshen Latvııada turatyn Kreml jaqtastarynyń jınalatyn ornyna aınalǵan. Latvııa halqynyń úshten birine jýyǵyn quraıtyn orys halqy birneshe kúnnen beri eskertkishti buzýǵa qarsylyq tanytqan. Reseı úkimeti de bul áreketke qatań narazylyq bildirdi.
Memorıaldyq keshen 1985 jyly KSRO-nyń fashıstik Germanııany jeńgenine 40 jyl tolýyna oraı turǵyzylǵan. Latvııa bıligi ony «basqynshylyqqa arnalǵan eskertkish» dep atady.
Latvııa Prezıdenti Egıls Levıts memorıaldyq keshenniń bólshektenýin quptady.
«Bul eskertkish deportasııa men repressııany eske salatyn túrli taǵdyrlarmen baılanysty keshen. Bizge mundaı eskertkishtiń qajeti joq», dedi ol.
Aıta keteıik, mamyr aıynda Latvııa bıligi Reseımen memorıaldyq qurylymdardy saqtaý týraly kelisimdi buzdy.
