Mońǵolııanyń Ǵylym akademııasy Tarıh jáne arheologııa ınstıtýtynyń arheology A. Enhtórge, túrkolog ǵalymdar N. Bazylhan men N. Bógenbaevqa mınıstrliktiń «Ǵylymdy damytýǵa sińirgen eńbegi úshin» tósbelgisi tabystaldy. Sondaı-aq, atalǵan ǵalymdarǵa jáne Halyqaralyq Túrki akademııasynyń Prezıdenti D. Qydyrálige mınıstrdiń alǵys hattary berildi.
Jıynda 24-tamyz kúni Nomgon óńirinde júrgizilgen ǵylymı arheologııalyq ekspedısııanyń nátıjeleri jarııalandy. Ekspedısııany Halyqaralyq Túrki akademııasy men Mońǵolııa Ǵylym akademııasynyń Arheologııa ınstıtýty birlesip júrgizgen edi.
Nomgondaǵy qazba jumystarynyń arqasynda Ortalyq Azııadaǵy Shyǵys túrkileriniń qaǵan-knıaz tıpindegi memorıaldyq keshenderin ereksheleıtin negizgi arhıtektýralyq komponentterden turatyn túrki dáýiriniń buryn belgisiz bolǵan taǵy bir eskertkishi ashyldy. Kóne túrkilik rýna jáne soǵdy tilinde qashalǵan jazýy bar bitiktastyń bir bóligi, tasbaqa tuǵyry, antropomorfty bádiz bóligi (qaǵannyń jartylaı beınesi) jáne zoomorfty músinder (arystan men qoı músinderi) tabyldy.
Ǵalymdar Nomgon kesheni Kúltegin men Bilge qaǵannyń ákesi, Túrik qaǵandyǵyn qaıta jańǵyrtýshy Qutlyq Elteris qaǵanǵa arnalǵan degen boljam jasap otyr.
Mınıstr Saıasat Nurbek bul jańalyqtyń mańyzdylyǵyn atap ótip, halyqaralyq ekspedısııa múshelerine túrkologııaǵa jáne álemdik ǵylymǵa qosqan úlesi úshin alǵys bildirdi.
«Mońǵolııadaǵy Nomgon memorıaldyq kesheniniń tabylýy otandyq jáne sheteldik túrkitanýshy ǵalymdardyń tarıhı jetistigi dep esepteımin. Bizdiń elimiz, túrkitildes memleketter men álemdik qaýymdastyq úshin bul zertteý jumystarynyń mańyzy zor»,dedi Saıasat Nurbek quttyqtaý sózinde.
Sonymen qatar mınıstr Mońǵolııanyń Bilim jáne ǵylym mınıstrligine jáne Ǵylym akademııasyna qoldaý bildirgeni úshin alǵys aıta otyryp, keleshekte de birlesken ǵylymı jobalardy júzege asyrýǵa senim bildirdi.
