Jańa mektepke qazaqtyń kórnekti aǵartýshysy Ybyraı Altynsarınniń esimi berildi. Ashylý saltanatyna Nur-Sultan qalasy ákiminiń orynbasary Eset Baıken, qalalyq bilim basqarmasynyń basshysy Qasymhan Senǵazıev jáne «Bilim bolashaǵy» kommersııalyq emes uıymynyń ókilderi qatysty.
Endi BINOM oqý oryndaryna bilim men ǵylymnyń damýyna úles qosqan uly tulǵalardyń esimderin alatyn bolady.
Atalǵan mektep-lıseıde oqytý eki tilde júrgiziledi, qabyldaý QR Bilim mınıstrliginiń úlgilik qaǵıdalary boıynsha júzege asyrylady. Jobalyq qýattylyǵy – eki aýysymda 4 myń oqýshy orny.
Zamanaýı syn-qaterlerdi eskere otyryp, mekteptiń materıaldyq-tehnıkalyq bazasy oqýshylardyń fýnksıonaldyq saýattylyǵyn damytýǵa múmkindik beredi.
Aıta keteıik, bilim berý salasyndaǵy MJÁ pılottyq jobalary elordada ótken jyldan bastap júzege asyrylýda. Investorlar ákimdikpen birlesip salǵan oqý oryndary qala turǵyndary arasynda belsendi suranysqa ıe.
BINOM mektepteri jelisiniń bilim berý prosesterin basqarýdy «Bilim bolashaǵy» kommersııalyq emes uıymy júzege asyrady, onyń basty maqsaty – Qazaqstan balalaryna qoljetimdi jáne sapaly bilim alýǵa teń múmkindikter berý.
Nur-Sultanda 3 jyl ishinde 34 mektep salyndy. Oqý oryndarynyń qurylysy qalanyń barlyq aýdanynda júrip jatyr. Elordada 2022 jyly taǵy 11 mektep salynady, osylaısha 20 myńnan astam oqý orny ashylady.
Sonymen qatar, elordada mektep salý úshin 72 jer ýchaskesi belgilendi. Jalpy alańy 120 myń oqýshy ornyna (eki aýysymda 240 myń oqýshy orny) arnalǵan oqý oryndaryn salýǵa múmkindik beredi.
Bul jer ýchaskeleri áleýmettik nysandarǵa qajettilikti eskere otyryp, qalanyń barlyq aýdanynda ornalasqan. Egjeı-tegjeıli josparlaý josparyna (egjeı-tegjeıli josparlaý jobasyna) árbir aýdanda (shaǵyn aýdandarda) oqý oryndary bolýy úshin arnaıy baǵyt bekitildi.
