Áıelder arasynda ótetin jarysta Qazaq eliniń namysyn álemdik reıtıngte 14-orynda turǵan Jansaıa Ábdimálik (2495 upaı) qorǵaıdy. Reglamentke saı qabyldaýshy el týrnırge taǵy bir oıynshyny qosýǵa quqyly. Bul rette tańdaý Bıbisara Asýbaevaǵa (2439) tústi. Qazirgi kezde ol úzdikter tiziminde 32-oryndy ıelenýde. Árıne, oǵan qaraǵanda Dınara Sádýaqasovanyń (2446) kórsetkishi birshama jaqsy. Tájirıbeli shahmatshymyz bul kúnderi 28-satyǵa jaıǵasty. Alaıda Dınara sońǵy kezderi dúbirli dodalarǵa sırek qatysyp júr. Sol sebepti de ulttyq qurama bapkerleri Bıbisaraǵa senim artýdy qup kórdi. Qalaı bolǵanda da, biz jerlesterimizge úlken úmit artyp otyrmyz. О́z elimizde, óz jerimizde ótetin baıraqty básekede qazaq qyzdary namysty qoldan bermeıdi degen oıdamyz.
Nur-Sultanǵa keletin «oılylar oıyny» ókilderiniń tórteýi – reseılikter. Olar – Aleksandra Gorıachkına (FIDE reıtınginde №2 oryn, 2579 upaıy bar), Ekaterına Lagno (№4, 2547), Aleksandra Kostenıýk (№11, 2521) jáne Polına Shývalova (№12, 2510). Sonymen qatar baq synaýshylar arasynda qytaılyq Tan Chjýnı (№9, 2525) men Chjý Szıner (№21, 2464), polshalyq Alına Kashlınskaıa (№15, 2504), germanııalyq Dınara Vagner (№116, 2341) men Elızabet Pets (№13, 2484) jáne úndistandyq Konerý Hampı syndy áıgili shahmatshylar bar. Olardyń reıtıngte joǵary oryndarǵa jaıǵasqandaryn aıtpaǵanda, keıbiri kezinde álem chempıony ataǵynan da úmitker bolǵan.
Mine, elorda tórinde ótetin dúbirli dodada bizdiń burymdylarǵa osyndaı ataqty shahmatshylarmen sheberlik baıqasýǵa týra keledi. Osy jarysty tamashalaý úshin elimizdiń Mádenıet jáne sport mınıstri, FIDE prezıdenti jáne taǵy basqa da laýazymdy tulaǵalar keledi dep kútilýde. Eń bastysy, Women Grand Prix-2022 týrnırleri serııasynda eń kóp upaı jıǵan oıynshy álemdik táj úshin talasý múmkindigine ıe bolady.
