Aýyl sharýashylyǵy mınıstrliginiń resmı málimetine súıensek, ortasha ónimdilik gektaryna 12,3 sentnerdi qurap otyr. Ázirshe 7,5 mln tonna astyq bastyrylǵan. Bul ótken jylǵy kórsetkishten 2,5 mln tonnaǵa artyq. 2021 jyldyń 1 qyrkúıeginde 5,1 mln tonna bastyrylǵan edi.
Bıyl ónimdiliktiń ósýine aýa raıynyń qolaılylyǵy, sondaı-aq kóktemgi dala jumystary kezinde agrotehnıkalyq sharalar keshenin ýaqtyly júrgizý jáne ósimdikterdiń ósip-óný kezeńinde qolaıly fıtosanıtarııalyq jaǵdaıdy qamtamasyz etý yqpal etken.
Mınıstrliktiń málimetinshe, ishki tutyný men qazaqstandyq naryqty qamtamasyz etýge jáne bıdaıdyń bir bóligin eksportqa jóneltý úshin astyqtyń jetkilikti kólemi alynady dep boljanyp otyr.
Qarjylandyrýǵa keletin bolsaq, 2022 jyly bıýdjettik kredıt 140 mlrd teńgeni qurady. Bul – 2021 jylǵy deńgeıden eki ese joǵary. Astyqty forvardtyq satyp alý sheńberinde qarjylandyrý 100 mlrd teńgege deıin kóbeıdi nemese bir jyl burynǵyǵa qaraǵanda 2,5 ese artty.
Memleket basshysynyń tapsyrmasyn iske asyrý aıasynda «Jasyl damý» AQ qarajaty esebinen aýyl sharýashylyǵy tehnıkasyn jeńildikpen nesıeleý tetigi pysyqtalǵanyn atap ótý qajet. Jeńildikti lızıngke shamamen 40 mlrd teńge bólindi.
Buǵan qosa egin jınaý jumystaryn ýaqtyly júrgizý úshin aýyl sharýashylyǵy taýaryn óndirýshilerge 423,5 myń tonna jeńildetilgen dızel otyny bólindi.
Mınıstrlik egin jınaý jumystaryn tabysty júrgizý máselesin turaqty baqylaýda ustap otyr. Ol úshin vedomstvoda barlyq týyndaǵan máseleni ýaqtyly sheshýge arnalǵan jedel shtab jumys isteıdi.
