Qazirgi kezde Reseıdiń ASA (Absolute Championship Akhmat) Gran-prı týrnıri ótip jatqany belgili. Jeńil salmaqtylar arasyndaǵy jarystyń júlde qory 800 myń AQSh dollaryn qurıdy. Sol somanyń 200 myńy bas júldeni oljalaǵan oǵylanǵa beriledi. Baq synaýshylar qatarynda «Spartak» degen janama atpen tanylǵan bizdiń Artem Reznıkov ta bar. Shyǵys Qazaqstan oblysy Rıdder qalasynda dúnıege kelgen ol óziniń tusaýkesker kezdesýinde brazılııalyq Deıvı Ramosty upaı sanymen utty. Jartylaı fınalda jerlesimiz daǵystandyq Rashıd Magomedov pen cherkes Álı Bagov arasyndaǵy básekeniń jeńimpazymen kúsh synasýǵa tıis edi. Alaıda osydan biraz ýaqyt buryn olar jekpe-jekke shyqqanymen, bir-birine soqqy jumsamaı, oktagondy aınalyp júrip aldy. San myń kórermen ábden mezi boldy. Soǵan qatty narazy bolǵan ASA promoýsheniniń qojaıyny Maırbek Hasıev ekeýin de jarystan shettetken edi.
Sol kezden beri «Endi Artem kimmen aıqasady?» degen saýal jekpe-jek dese, delebesi qozatyn jankúıerlerdi jıi mazalady. Kúni keshe ASA basshylarynyń kimge tańdaýy túskeni belgili boldy. Jeltoqsan aıynda Máskeýde jalaýy jelbireıtin jarysta «Spartak» Andreı Koshkınmen kúsh synasady. 25 qyrkúıekte 32 jasqa tolǵaly otyrǵan Reseı sportshysynyń pankratıonnan eki dúrkin álem chempıony degen ataǵy bar. Jaýyngerlik qoıan-qoltyq aıqastan da biraz belesti baǵyndyrǵan. 2013 jyldan beri aralas jekpe-jekke myqtap den qoıdy. Sol aralyqta 30 márte oktagonǵa shyǵyp, 22 ret basymdyq tanytty. 12 qarsylasyn esinen tandyrdy. Kóbine-kóp ol qol men aıaqtyń soqqylaryna júginedi. Iаǵnı tik turyp jaqsy tóbelesedi. Osydan týra toǵyz jyl buryn Koshkınniń qazaqstandyq Igor Svırıdpen saıysqa túskeni de esimizde. Sol jarysta Svırıd qarsylasyn birinshi raýndta-aq qylqyndyryp tastaǵan edi. Al 2014 jyldyń kókteminde ol taǵy bir jerlesimiz Islam Dzadzıevty nokaýtpen utty.
2017 jyly Koshkın ASA-nyń chempıondyq belbeýi úshin talasty. Alaıda Máskeýde uıymdastyrylǵan jekpe-jekte ol jergilikti sportshy Edýard Vartanıanǵa ese jiberdi. О́ziniń sońǵy jekpe-jegin reseılik faıter ústimizdegi jyldyń 22 shildesinde qyrǵyzstandyq Altynbek Mamashevqa qarsy ótkizip, ony upaı sanymen utty. Negizinen Andreı óziniń aýyr soqqylaryna senim artsa, Artem Reznıkovtiń myqty balýan ekeni barshaǵa málim. Kezinde ol erkin kúresten jaqsy nátıjeler kórsetken.
Al ASA Gran-prıiniń ekinshi jartylaı fınaldyq básekesi Erevanda dúnıege kelip, bul kúnderi Máskeýde turyp jatqan 31 jastaǵy Edýard Vartanıan men Saratov oblysynda týǵan 27 jastaǵy cheshen jigiti Iýsýf Raısovtyń arasynda ótedi.
