Oblystyń aýyl sharýashylyǵy óndirýshileri óz ónimderin deldalsyz tikeleı satady, sonyń nátıjesinde ónimniń baǵasy 10-20%-ǵa tómen.
Jambyl oblysy Aýyl sharýashylyǵy basqarmasynyń basshysy Erbol Jıenqulovtyń aıtýynsha, bıyl jármeńkege 423 mıllıon teńgege 495 tonna ónim ákelingen.
«Elordaǵa bizdiń óńirden 90-nan astam kásipker óz ónimderin ákeldi. Olardyń arasynda jylqy eti, sıyr eti, qoı eti, taýyq eti, shujyq ónimderi, sút ónimderi, jumyrtqa, kondıterlik ónimder, makaron ónimderi, balyq, bal jáne ózgeleri bar. Jambyl oblysynan ákelingen barlyq ónim naryqtan 15-20%-ǵa tómen. Sonymen qatar biz osy jármeńkege Merkidegi zaýyttan qant jetkizýdi uıymdastyrdyq. 10 tonna qant ákelindi, ol kılogramyna 480 teńgeden satylady», dedi basqarma basshysy.
Aýyl sharýashylyǵy óndirýshileri astanalyqtar úshin aldaǵy ýaqytta qoljetimdi baǵada kókónis pen jemis-jıdek satýǵa múmkindik bar ekenin atap ótti. Sonymen qatar mundaı jármeńke tek turǵyndarǵa ǵana emes, óndirýshilerdiń ózderine de paıdaly. Mysaly, Málik Jumaǵulov óz ónimin Shý aýdany Tóle bı aýylynan jetkizdi.
«Biz elordaǵa jármeńke bastalardan bir kún buryn keldik. Búgin tańǵy 7-den bastap jumysqa kiristik. Qarbyz, pııaz, sábiz, qaýyn jetkizdik. Biz qarbyzdyń kılogramyn 100 teńgeden satamyz. Pııaz da 100 teńgeden. Sýpermarketterde pııazdyń baǵasy 150-160 teńge shamasynda bolsa, biz ony 90-100 teńgeden satamyz. Bul jármeńkege biz 11 tonna qarbyz ákeldik. Qala turǵyndary bizdiń ónimderimizdi unatyp jatyr. Osyny uıymdastyrǵan ákimdikke úlken alǵysymdy bildiremin», dedi ol.
Jármeńkege tańerteń kelgen qala turǵyny uıymdastyrýshylarǵa alǵys bildirip, taýarlar men baǵalar týraly óz oıyn jetkizdi.
«Jármeńkeni uıymdastyrýshylarǵa alǵys aıtqym keledi. Jurt Jambyl oblysynan jetkizilgen taýarlardyń sapasyna óte rıza. Baǵalar qoljetimdi. Maǵan qarbyz ben qaýyn unady. Sút ónimderiniń, ettiń neshe túri bar. Sondaı-aq 480 teńgeden birneshe kılogramm qant satyp aldym», dedi qala turǵyny.
