«Qazaqaltyn Technology» JShS fabrıkasy tehnogendi-mıneraldy túzilimderdi qaıta óńdeý maqsatynda 2017 jyly salynǵan. Tehnogendi-mıneraldy túzilim degenimiz – Jolymbet altyn ken ornyndaǵy baıytý fabrıkasyn paıdalanǵan alpys jyl ishinde jınaqtalǵan óndiris qaldyqtary. Bul qaldyqtar óńdelgen soń, qazirgi ekologııalyq zańnamanyń talaptaryna saı qaıta ornalastyryldy.
Fabrıka tehnogendi-mıneraldy túzilimderdi óńdeýdi 2021 jyly aıaqtady. Quramyna «Qazaqaltyn Technology» JShS kiretin «Altynalmas» kompanııasy shıkizat bitkende fabrıkany jabýdyń ornyna altynquramdy ken óńdeý maqsatynda modernızasııalaý týraly sheshim qabyldady.
Sondaı-aq óndiris qaldyqtarynda tereńirek ornalasqan qymbat metaldy shyǵarý úshin tehnogendi-mıneraldy túzilimderdi qaıta óńdeý týraly sheshim qabyldandy. Ekinshi fazany, ıaǵnı jyldyq ónimdiligi 4 mln tonna bolatyn sehty iske qosý jumystary 2022 jyldyń sáýirinde bastalyp, shilde aıynda aıaqtaldy. Bıyl 450 kılogramm altyn shyǵarý josparlanǵan.
Kásiporyn óndiristi kidirtpesten 18 aı boıy modernızasııalandy. 2021 jyldyń qarashasynda jyldyq ónimdiligi 650 myń tonna bolatyn ken óńdeý sehyn iske qosý jáne jóndeý jumystary bastaldy, olar osy jyldyń qańtarynda aıaqtaldy. О́tken jyldyń jeltoqsanynda konveıerden alǵashqy quıma shyqty. Al bıyl kásiporyn 710 kılo altyn shyǵarýdy josparlap otyr.
– Tehnogendi-mıneraldy túzilimderdi óńdeý fabrıkasynyń burynǵy óndiristik qýaty jylyna 2,25 mln tonnany quraıtyn. Modernızasııalaýdan keıin fabrıkasynyń jyldyq qýaty 4 mln tonnany, al ken óńdeýde 650 myń tonnany qurady, – deıdi «Qazaqaltyn Technology» JShS Jolymbet fılıalynyń dırektory Edil Otynbaev.
Jumysty bastamas buryn qorshaǵan ortaǵa tıetin áserge keshendi baǵalaý júrgizilgen. Ol jumys istep turǵan «Qazaqaltyn Technology» JShS óndirisin modernızasııalaý saldarynan qorshaǵan orta jaǵdaıy ózgermeıtinin kórsetti. Atap aıtsaq, altyn shyǵaratyn fabrıka tehnologııalyq shemasynda sý resýrstaryn paıdalanýdyń tuıyq sıkli kózdelgen, al óndiristik aǵyndylar jer bederine aqpaıdy.
Jańartylǵan fabrıka qaýipsiz óndiristiń barlyq normasy men standartyna saı jáne zamanaýı jabdyqtalǵan. Kásiporynda tek osy jyldyń ózinde jańa 75 jumys orny ashyldy.
– «Altynalmas» – altyn óndirisinde tehnogendi-mıneraldy túzilimdi qaıta óńdeý tehnologııasyn qoldanatyn Qazaqstandaǵy jalǵyz kompanııa. Fabrıkany modernızasııalaýdaǵy basty artyqshylyq – jańadan qurylǵan jumys oryndary jáne bıýdjetke túsetin qosymsha salyq. Senimdi ınjenerlik júıelerdi paıdalanyp, sıfrlyq sheshimderdi engizgendikten, fabrıka ujymy qaýipsiz ári jaıly jaǵdaıda jumys isteıdi, úzdiksiz damıdy jáne jańa tehnologııalardy ıgeredi, – deıdi «Altynalmas AK» AQ basqarma tóraǵasy Dııar Qanashev.
Modernızasııalanǵan fabrıkaǵa arnalǵan ken jaqyn mańdaǵy Jolymbet kenishinde óndiriledi. Osylaısha, fabrıkany modernızasııalaý nátıjesinde, Jolymbet ken ornynyń ken óńdeý kólemi artty. Tehnogendi-mıneraldy túzilimdi qaıta óńdeý sehyndaǵy sońǵy ónim – altynquramdy kómir. Ol «Altynalmas AK» AQ Aqsý altyn shyǵarý fabrıkasyna jiberiledi. Ken óńdeý sehynda altyn-kúmis quımalar túrindegi Dore qorytpasy óndiriledi.
