Osymen 10 márte jalaýy jelbirgen jarysqa qos komanda da óte jaqsy daıarlyqpen kelgen eken. Alǵashqy on mınýtta olar ańdasyp qana júrdi. Tek «Aıattyń» sapyndaǵy brazılııalyq legıoner Leandrıno gol soqqannan keıin ǵana oıyn qatty qyzdy. Arada alty mınýt ótkennen soń dál sol oıynshy ekinshi ret nysanany dál kózdedi. Birinshi kezeń rýdnyılyqtardyń basymdyǵymen aıaqtaldy. Úzilisten keıin «Qaırat» «qaharyna» mindi. Ekinshi taım bastalǵan bette olar qatarynan úsh ret mergendik tanytty. Bul goldardyń avtorlary – Dáýren Tursaǵulov, Albert Aqbalyqov jáne Shyǵys Esenamanov.
Aınaldyrǵan eki mınýt aralyǵynda úsh ret dopty torda týlatqan almatylyqtar odan keıin de qarqyndaryn esh báseńdetken joq. 33-mınýtta Aqbalyqov nysanany dál kózdedi. Kezdesý aıaqtalýǵa taıaǵanda Anton Ryndın esep aıyrmashylyǵyn qysqartty. Alaıda odan árige «Aıattyń» áli jetpedi. Sóıtip, Almatynyń «Qaıraty» jetinshi márte Qazaqstan sýperkýbogyn ıelendi.
Sondaı-aq keshe Aqtaýda Qazaqstan kýbogy bastaldy. Bul jarys jańa formatta ótýde. «A» tobynda «Kaspıı» (Aqtaý), «Qaırat» (Almaty), «Astana» (Nur-Sultan) jáne «Rahmet» (Aqtóbe) óner kórsetse, «V» tobynda «Atyraý», «Aqtóbe», «Aıat» (Rýdnyı) jáne «Baıterek» (Oral) sheberlik baıqasýda. Toptyq týrnır 10 qyrkúıekte óz máresine jetedi. Al jartylaı fınaldyq jáne fınaldyq básekelerdi jeltoqsanda tamashalaımyz.
