Bul mektep qurylysy byltyr bastalyp, jańa oqý jylyna deıin oqýshylardy qabyldaýǵa daıyn boldy. Aýdanǵa saparmen kelgen oblys ákimi Nurlybek Nálibaev osy №71 orta mektepke baryp, jańa bilim oshaǵynyń tabaldyryǵyn attaǵan ustazdar men oqýshylarǵa tilegin jetkizdi.
Bıyl oblystaǵy apatty dep tanylǵan 4 mekteptiń úsheýiniń ornyna jańa ǵımarat salynyp jatyr. Mysaly, osy aýdandaǵy Toqabaı eldi mekeninde №248 orta mektep jeke ınvestor esebinen qaıta boı kóterýde. Bul aýyl mektebin bıyl bitirgen oqýshylarynyń barlyǵy memlekettik grant ıegeri atanyp otyr.
Aldaǵy 3 jylda osy Aral aýdanynyń ózinde 8 mektep salynbaq. Olardyń qatarynda kezinde asar ádisimen qolda bar materıaldarmen soǵylǵan Sapaq aýyldyq okrýgindegi №69 orta mektep pen Mergensaı eldi mekenindegi №58 orta mektep keler jyly salynady. Jalpy, oblysta aldaǵy 3 jylda 32 bilim oshaǵy boı kóteredi.
Aýdandaǵy áleýmettik nysandar qataryna Jaqsyqylysh kentinde ashylǵan «Asylym» atty jeke balabaqsha qosyldy. Balabaqsha 140 balaǵa laıyqtalǵan. Oblys ákimi aýyl turǵyndaryn jańa nysannyń ashylýymen quttyqtap, bilimge ınvestısııa quıǵan kásipkerge alǵys bildirdi. Jalpy, Aral 3 pen 6 jas aralyǵyndaǵy baldyrǵandardy balabaqshamen 100 paıyz qamtyǵan aýdan atanyp otyr. Aldaǵy ýaqytta aýdanda 16 jeke balabaqsha jáne mektep janynan 4 shaǵyn ortalyq ashylmaq.
Sapar barysynda Nurlybek Nálibaev Aralqum aýyldyq okrýgine qarasty Shómish eldi mekenindegi «Laton-Market» JShS demeýshiligimen salynǵan ámbebap kishi sport alańyn kórip, aýyl turǵyndarymen kezdesti.
– Balalarǵa tartý retinde óńirde parkter, skverler salynýda. Jaqynda ǵana Jańaqorǵanda mesenat 750 mln teńgege park salýdy bastap ketti. Odan bólek oblys ortalyǵy men aýdandarda demeýshiler qoldaýymen 80 balalar alańy boı kóteredi. «Anaǵa taǵzym» atty alań salýǵa 1,5 mlrd teńge jumsaýǵa bel baılaǵan azamatqa da alǵys aıtamyz. Balalar jylynda osyndaı kásipkerler baldyrǵandarǵa osyndaı tartý jasap otyr, – dedi N.Nálibaev.
Aýdandaǵy jylyna 120 myń tonna kvars qumyn óndiretin Aral Quarts taý-ken kombınaty alǵashqy kezeńde 40 adamdy jumyspen qamtysa, 172 myń tonna qurǵaq qurylys untaǵyn shyǵarýǵa kóshkennen bastap eńbekke tartylǵan mamandar qatary artty. О́ndiris orny ishki naryqty 80 paıyz ónimmen qamtıdy. Oblys basshysy bolashaqta oblys ortalyǵynda iske qosylatyn shyny zaýytyna dem berýge múmkindigi jetetin kásiporyn jumysyn tıimdi úılestirýdi tapsyrdy.
Amanótkel aýyldyq okrýgindegi dene shynyqtyrý jáne saýyqtyrý kesheni «Aýyl – el besigi» baǵdarlamasy aıasynda ashylyp otyr. Jańa keshende oblys ákimi jastarmen júzdesip, pikirlesti. Munda bir mezette 40 bala basketbol, voleıbol, shaǵyn fýtbol oınaı alady. Aýdanda mundaı deneshynyqtyrý-saýyqtyrý kesheni Jaqsyqylysh kenti men Qamystybas eldi mekeninde de salynyp jatyr.
Qyzylorda oblysy
