Jalpy, Qazaqstan halqy Assambleıasynyń Jańa Qazaqstannyń qalyptasýynda ózindik mıssııasy bar. Bul týraly QHA tóraǵasynyń orynbasary Taýfık Kárimov aıtyp ótti. Onyń pikirinshe, Joldaý halyqtyń birligi, yntymaǵy men birtutastyǵy – jarasqan ekonomıkalyq ólshemniń aıqyn kórinisi. «Eldegi áleýmettik ál-aýqattyń, beıbitshilik pen kelisimniń materıaldyq negizin jasaıtyn ekonomıkalyq reformalardyń tabysty bolýy turaqtylyq pen birlikke baılanysty. Usynylǵan ekonomıkalyq reformalar paketi ekonomıkalyq damýdyń sıpatyn túbegeıli ózgertip, ony turǵyndardyń áleýetin ashýǵa baǵyttalǵan», dedi ol.
Keńeste depýtat, sarapshy, ǵalymdar memlekettik til taǵdyryn, Prezıdenttiń kezekten tys saılaýyn, eldiń ekonomıkalyq jaǵdaıyn keńinen sóz etti.
Otyrysta sóz alǵan Qaraǵandy oblysy boıynsha Qoǵamdyq keńestiń tóraǵasy Bekzat Altynbekov Joldaýda aıtylǵan usynystar jańa ekonomıkalyq saıasatqa betburys jasaıtynyn málimdedi. «Ashy da bolsa aqıqatyn aıtaıyq, bizdiń ekonomıkanyń jetekshi baǵyttary áli de shıkizatqa táýeldilikten aryla almaı otyr. Elimizde elektr qýatyn taratýshy kompanııalar men basqa da kommýnaldyq qyzmetpen aınalysatyn kásiporyndar menshigindegi jelilerdiń 57%-dan astamy jaramsyzdyq sheginde turǵanyna alańdaýshylyq bildirgen Prezıdent osy kompanııalardyń ınvestısııalaý belsendiligin eskerý arqyly tarıf saıasatyn kúshpen ustap turýdy shekteý qajettigin aıtty. Iаǵnı Memleket basshysy usynyp otyrǵan «Tarıfti ınvestısııaǵa aıyrbastaý» jobasynyń tıimdiligi zerdelenýi kerek. Eger tarıf saıasatyndaǵy búgingi rejim ózgermese, biz aıtyp otyrǵan jeliler men qubyrlardyń birtindep isten shyǵýy nemese apatty jaǵdaılarǵa alyp kelýi ábden múmkin. Sondyqtan jańa tarıf saıasatyn qarapaıym halyqqa túsindirý jumysynda barshamyz belsendilik tanytýǵa tıispiz. Ekonomıkanyń turaqty damýy qoldanystaǵy salyq saıasatyna tikeleı táýeldi. Salyq salasynyń baqylaý qyzmetin sıfrlandyrý, paıdanyń jańǵyrýǵa jáne ǵylymı negizdemelerge jumsalǵan bóligine salynatyn korporatıvti tabys salyǵyn jeńildetý nemese odan bosatý tásilin engizý, «sán-saltanatqa salyq salý» tártibin engizý sekildi salyq reformalaryn qamtyǵan jańa Salyq kodeksi ázirlenip jatyr. Sondaı-aq Joldaýda memlekettik mekemelerdiń ıgere almaǵan qarajatyn kelesi jylǵa qaldyrý tártibin engizý qajettigi de aıtyldy. Bul da – jańa ekonomıkalyq saıasattyń óte tıimdi baǵyttarynyń biri. Bolashaqta sý tapshylyǵy el ekonomıkasyna da, halyq turmysyna da zor kedergi, mol qıyndyqtar ákelýi múmkin», dedi ol.
B.Altynbekov osyndaı iri jobalardyń jumysyna Assambleıa belsendilerin qoǵamdyq baqylaýshy retinde qatystyrý qajettigin alǵa tartty. «Bul turǵyda máslıhat depýtattary, jergilikti ózin ózi basqarý qurylymdary, qoǵamdyq keńes músheleri bizben áriptestik ornatyp, eldiń jarqyn bolashaǵy úshin jumyla jumys júrgizemiz dep senemin», dedi sarapshy.
Al QHA respýblıkalyq Analar keńesiniń múshesi Baıan Ahataı Joldaýda aıtylǵan birneshe máseleni qozǵady. «Ulttyń uıysýy – damýdyń basty baǵdary. Áleýmettik jelide narazylyqqa ulasqan til máselesi tolǵandyrmaı turmaıdy. Memleket basshysy qazaq tilin de, orys tilin de jetik meńgerýi balalarǵa tek paıdasy tıetindigin aıtty. Bul oraıda orys tiline qarsylyq tanyta bergennen góri, qazaq tilin úıretýdiń sapaly ádis-tásilderin oılastyrý tıimdi. Etnosaralyq qatynastardyń úılesimdi damýynyń bastaýy da dastarqan basynan bastalady. Ár alýandylyǵymyzdy arazdyqqa emes, aýyzbirlikke jumyldyrýymyz úshin ár qazaqstandyq qyzmet etýi kerek. Sonymen qatar qazaq tili, shyn máninde, bilim men ǵylymnyń, mádenıet pen is júrgizýdiń tiline aınaldyrý ár qazaqstandyqtyń azamattyq paryzy der edim. Memleket basshysynyń «Memlekettik tildi qoldaný aıasy keńeıip keledi, bolashaǵyn Otanymyzben baılanystyratyn árbir azamat qazaq tilin úırenýge den qoıýǵa tıis» degen sózin otbasynan bastap nasıhattap otyrsaq, bizdiń týǵan tilimizge naǵyz qyzmetimiz sol bolmaq. Ana tilin ardaqtaı júrip, álem tilderin meńgerse balalarymyz utpasa, utylmaıdy. Tildiń salmaǵyn ár azamat salıqaly sózimen jáne naqty isimen kóterse, tilimiz sonda shyn dáriptelmek. Balalardyń boıyna osyndaı qundylyqtardy ege otyryp tárbıeleı alsaq, ózimiz armandaǵan aldyńǵy qatarly, qazaq tildi qoǵam ornaýynyń aýyly alys emes», dedi Baıan Ahataı. Sondaı-aq ol bilim, ǵylym, bala tárbıesine de keńinen toqtaldy. «Sapaly bilimge mektep sanynyń saı kelmeı jatqany ras. Bul boıynsha atqarylatyn is-sharalar kezeń-kezeńimen oń nátıjesin beredi. «Jaıly mektep» jobasy júzege assa salanyń biraz máseleleri sheshiledi. Osy oraıda Memleket basshysy mektepke deıingi oqytý men tárbıe salasyndaǵy olqylyqtarǵa ashyq toqtalyp, tárbıeshilerdiń áleýmettik jaǵdaıyn kóterý, bilimi men sapalyq quramyn jetildirýge basa nazar salǵandyǵy qýantady. Balabaqsha balalarynyń bapkeri biliktiligi men jaǵdaıy bóbekterdiń durys adam bolyp qalyptasýynyń negizin qalaıdy. Osy tusta keshendi jumystar atqarylady dep bilemin», dep pikirin túıindedi.
Is-shara barysynda QHA Keńesiniń músheleri ultaralyq qatynastardyń úılesimdi damýyna keri áserin tıgizetin kez kelgen qoǵamdyq arandatýshylyq pen zańsyz áreketterge qatań jaýap berý qajettigin aıtty. Sondaı-aq jıynǵa qatysýshylar aqparattyq keńistikte ózara senimsizdik, qoǵamda alaýyzdyq týdyrýdy toqtatýǵa shaqyrdy.
