Jol salasyndaǵy qujattar jańarady

Indýstrııa jáne ınfraqu­ry­lymdyq damý mınıstrliginiń habarlaýynsha, jobalaý, qurylys jáne avtomobıl joldaryn paıdalanýǵa berýdiń sapasyn arttyrýda jol salasyndaǵy qurylys normalary, standarttary men normatıvtik-tehnıkalyq qujattar bazalyq ról oınaıdy. Búginde elimizde 1 200-den asa salalyq qujat qol­da­nys­ta. Onyń ishinde 114 qurylys nor­matıvi, 303 ulttyq standart, 527 memleketaralyq standart, 17 vedomstvolyq norma, 200 vedomstvolyq normatıvtik-tehnı­kalyq qujat jáne 56 baǵa belgileý men smetalyq jınaq bar.

Profıldik qujattardyń shamadan tys kóp bolýy men retsizdigi olardy basymdyqtar boıynsha anyqtaý kezinde birshama qolaısyzdyq týdyrady. Sonymen birge qujattarda jıi kezdesetin sáıkessizdikter, qarama-qaıshy talaptar, qaıtalama jáne eskirgen normatıvter jaǵdaıdy odan ármen kúrdelendirip, jobalaý men qurylysta kóptegen qatelikke jol beredi.

Bul oraıda qalyptasqan beıbereket qazirgi qoldanystaǵy mem­lekettik satyp alýlar kezindegi jaǵdaıdy týdyryp otyr. Bylaısha aıtqanda, qazir ulttyq standarttardy, onyń ishinde jol salasyndaǵy standarttardy ázirleýge kez kelgen fızıkalyq nemese zańdy tulǵanyń qatysýyna múmkindik beredi. Bul óz kezeginde normatıvtik qujattyń sapasynyń tómendeýine, onyń shynaıylyǵy men jol mekemeleri úshin qajettiligine áser etedi.

Jalpy, kez kelgen qurylys sapaly jobalaýdan bastalatyny belgili. Elimizdegi avtokólik joldary júıelerin damytý boıynsha ulttyq deńgeıdegi mindettemelerdi ońtaıly sheshý úshin Indýstrııa jáne ınfraqurylymdyq damý mınıstrligi avtokólik joly salasyn normatıvtik baqylaýǵa júıeli revızııa jasaý qajettigine mańyz berýde.

«Memleket basshysynyń bıyl­ǵy Joldaýynda aıtylǵan tap­syrmalardy oryndaý úshin Qazaq­stan jol ǵylymı-zertteý ınstı­týtyna normatıvtik bazany qalyp­tastyrý barysynda ózgeshe tásil qoldaný tapsyrylyp otyr. Ulttyq standartty ázirleý aldynda jan-jaqty ǵylymı zertteý júrgizilýge tıis. Sonymen qatar zerthanalyq jumystardyń nátıjesi, tájirıbelik aýmaqtar men pılottyq jobalarǵa uzaq ýaqyt boıǵy monıtorınginiń qorytyndysy da nazarǵa alynýy qajet», dep habarlady mınıstrlik.

Osy tarapta júrgizilgen refor­manyń nátıjesinde jetildirilgen jańa qurylymdyq normatıvtik qu­jat qurylýǵa tıis. Ondaǵy qujat­tar sany 50-70-ten aspaıtyn bola­dy. Jańa pakette standarttar men normatıvtik-tehnıkalyq qu­jat­tardyń basymdyǵyna aı­qyn shek­teýlerdiń engizilýine basym­dyq beriledi. Sondaı-aq jańa tehno­logııalardyń paıda bolýyna baılanysty qujattardyń opera­tıv­tik mańyzdylyǵyna da nazar aýdarylmaq.