Qostanaı oblystyq kásipkerler palatasynyń dırektory Danııar Kúzenbaevtyń málimetinshe, qazir búlingen bıznes nysandarynyń sany – 18. Onyń ishinde Áýlıekól aýdanynda – 17 nysan, Qarasý aýdanynda 1 nysan búlingen. Sondaı-aq aýyl sharýashylyǵy jabdyqtarynan 1 kombaın men 1 traktor janyp ketken.
Bul rette 12 kásipkerdiń múlkine kelgen zalal somasy 200 mln teńgeden asatyny anyqtalǵan. Al 6 nysan zalal somasyn áli anyqtap jatyr. Dámhana, tehnıkalyq qyzmet kórsetý stansasy, saýda jáne aýyl sharýashylyǵy taýaryn óndirýshiler sııaqty shaǵyn bıznes ókilderi zardap shegip otyr.
«Atameken» ulttyq kásipkerler palatasynyń tóralqa tóraǵasy Raıymbek Batalovtyń tapsyrmasy boıynsha tótenshe jaǵdaıdyń alǵashqy saǵattarynda jedel shtab qurylǵan bolatyn. Onda zardap shekken kásipkerler, sondaı-aq eldegi bıznes ókilderiniń Qostanaı oblysyna jiberetin kómegine qatysty aqparat jınalady.
– О́ńirlik keńes múshelerimen birge Áýlıekól aýdanyna zardap shekkenderge arnalǵan azyq-túlik, kıim-keshek jáne basqa da gýmanıtarlyq kómekpen eki ret bardym. Sondaı-aq biz qarjy mekemeleriniń basshylarymen qaryzdardy esepten shyǵarý máselesi boıynsha jumys júrgizip jatyrmyz. Bankter qarjy mekemeleriniń atyna jazylǵan tıisti hattardy qaraý ústinde. Múligine zalal kelgen bıznes sýbektileri anyqtaldy, keri baılanys ornatyldy, múlikti tekserý aktisi ázirlendi. Nysandardy foto jáne vıdeoǵa túsirip, resmı túrde tirkeý júrýde. О́rtten zardap shekkenderdiń tolyq tizimin, sonyń ishinde zalal somasy men nesıelik bereshekti anyqtaý úshin kásipkerlik sýbektilerine qońyraý shalý jalǵasyp jatyr, – deıdi D.Kúzenbaev.
Qazaqstandyq kásipkerler órtten zardap shekken turǵyndar úshin shamamen 200 mln teńge (Kostanay Music Fest – 50 mln teńge, «Agromashholdıng KZ» JShS Allur zaýytymen birlesip – 100 mln teńge), sondaı-aq 56 mln teńgege gýmanıtarlyq kómek jınady. Qostanaı halqyn Qazaqstannyń ár túkpirindegi óńirlik kásipkerler palatalary belsendi qoldap otyr.
6 qyrkúıekte Shyǵys Qazaqstan óńirlik kásipkerler palatasynan kómek joldandy. Sondaı-aq Túrkistan oblysynan 3 júk kóligi, mektep formasynyń jańa jıyntyqtary bar 2 júk kóligi, Aqmola kásipkerler palatasynan azyq-túlik kelgen. Keshe gýmanıtarlyq kómek tıelgen fýralar Túrkistan, Soltústik Qazaqstan, Shymkent, Nur-Sultan óńirlik palatalarynan jolǵa shyqty.
