Álemdik jáne dástúrli dinder lıderleriniń VII Sezine daıyndyq aıasynda Qazaqstandaǵy túrli konfessııalar men ulttar arasyndaǵy yntymaqtastyqty, dostyq pen birlikti beıneleıtin tabıǵı-rekreasııalyq saıabaq tujyrymdamasy ázirlengen edi.
Elorda ákimdiginiń qoldaýymen júzege asyrylǵan «Beıbitshilik pen kelisim saıabaǵy» dep atalatyn joba Nur-Sultan qalasyndaǵy Esil ózeniniń boıynda júzege asyrylady.
Qala ákimdigine qarasty Ýrbanıstıka ortalyǵynyń habarlaýynsha, jobanyń negizgi ıdeıasy – «О́mir aǵashy» monýmenti. Bul qurylys kúmbez túrinde jasalady. Onyń ortasyna japyraqty aǵash – emen aǵashyn ornalastyrý josparlanǵan. Aǵash spıralmen jáne úılesimdi sýburqaqpen – sý betimen qorshalady.
«Avtor ıdeıasyna sáıkes ǵasyrlar boıy tamyry tereńde jatqan sý men ómir aǵashy jer betindegi tirshiliktiń naqty beınesin aıshyqtaıdy. Osylaısha, ınstallıasııa barlyq konfessııalardyń kelisimge, beıbitshilik pen dostyqqa shaqyrýyn bildiredi. Kúmbez óz kezeginde bir aspan astyndaǵy álemdi beıneleıdi. Onda 4 negizgi núkteni – Ońtústik, Soltústik, Batys, Shyǵysty bildiretin 4 kirý aımaǵy bolady», dep habarlady Ýrbanıstıka ortalyǵynyń ókilderi.
Kúmbez qabyrǵalarynda Dúnıeniń jaratylýyn, Qazaqstan tarıhyndaǵy oqıǵalardy kórsetetin beıneler, sondaı-aq qazirgi zamanǵa úndeý retinde elimizdiń aýmaǵynan tabylǵan áıgili ejelgi jartas sýretteri – petroglıfter salynady. Aǵashtyń aınalasyndaǵy spıral aspandy (kúmbezdi) jáne jerdi (sý betin) baılanystyrady, osylaısha, álemniń náziktigi týraly ıdeıany jetkizedi.
Álemdik jáne dástúrli dinder lıderleriniń VII sezi delegasııalary basshylarynyń sany boıynsha «О́mir aǵashy» monýmentiniń aınalasyna 50-den astam japyraqty jáne qylqan japyraqty aǵashtar otyrǵyzylady. Shara delegattary da tutas konsepsııa negizinde ortalyq aǵashtaryn otyrǵyzýǵa qatysady. Aǵashtardyń janyna saıabaq irgetasynyń qoıylǵan kúni jazylǵan eskertkish taqtalar ornatylady.
Saıabaqtyń qurylysyn aıaqtap, paıdalanýǵa berý 2023 jylǵa josparlanǵan.
