Osy jyldyń birinshi jartyjyldyǵynyń qorytyndysy boıynsha memlekettik bıýdjettiń aýyl, sý, orman jáne balyq sharýashylyǵyna, sondaı-aq erekshe qorǵalatyn tabıǵı aýmaqtarǵa, qorshaǵan ortany qorǵaýǵa jáne janýarlar dúnıesin damytýǵa jumsalǵan shyǵyndary 305,3 mlrd teńgeni qurady. Bul kórsetkish byltyrmen salystyrǵanda 11,2 paıyzǵa joǵary.
2021 jylǵy qańtar-jeltoqsanda sala boıynsha memlekettik bıýdjet shyǵyndary 7,4 paıyzǵa ósip, 717,9 mlrd teńgeni quraǵan edi. Memlekettik bıýdjet shyǵyndarynyń jalpy kóleminde agroónerkásip kesheniniń úlesi – 3,1-4,4 paıyz aralyǵynda.
Banktik nesıelendirýge keletin bolsaq, munda bıyl qańtar-maýsym aılarynda aýyl, orman jáne balyq sharýashylyǵyna baǵyttalǵan nesıelerdiń kólemi 156,7 mlrd teńgeni qurǵan. Kórsetkish ótken jyldyń sáıkes kezeńimen salystyrǵanda 16,4 paıyzǵa kóp.
Jalpy, byltyrǵy qańtar-jeltoqsanda sektordy nesıelendirýge baǵyttalǵan nesıe kólemi 279,3 mlrd teńgege jetti. Bul budan bir jyl burynǵy deńgeıden 65,1 paıyzǵa artyq.
«Osy jyldyń birinshi jartyjyldyǵynda tıisti kezeńderde Qazaqstandaǵy nesıelerdiń jalpy kólemindegi aýyl sharýashylyǵy nesıeleriniń úlesi 1,5 paıyzdy, 2021 jylǵy qańtar-jeltoqsanda 1,3 paıyzdy qurady», delingen Finprom.kz habarlamasynda.
О́ńirler boıynsha osy jyldyń alty aıynda agroónerkásip keshenine baǵyttalǵan nesıelerdiń eń kóp kólemi Almaty qalasynda berilgen: 72,7 mlrd teńge. Kórsetkish 2021 jyldyń qańtar-maýsymymen salystyrǵanda 60 paıyzǵa joǵary. Úzdik úshtikte Qostanaı (19,7 mlrd teńge, 9,3 paıyzǵa azaıǵan) jáne Soltústik Qazaqstan (13,4 mlrd teńge, 2,6 paıyzǵa kóbeıgen) oblystary bar.
Eske sala keteıik, Qazaqstannyń aýyldyq eldi mekenderi men shaǵyn qalalarynyń turǵyndary aýyl sharýashylyǵy salasyndaǵy jobalardy júzege asyrý úshin shaǵyn nesıe ala alady. Bul úshin 40 mlrd teńge kóleminde bıýdjet qarajaty qarastyrylǵan. Qarjy agroónerkásip keshenindegi jobalardy mıkrokredıtteýge baǵyttalady. Nesıelendirý operatory – «Agrarlyq nesıe korporasııasy» AQ. Bıýdjettik nesıelerdiń maqsatty paıdalanylýyn jáne respýblıkalyq bıýdjetke ýaqtyly qaıtarylýyn baqylaý Aýyl sharýashylyǵy mınıstrligine júktelgen.
