Qasym-Jomart Toqaev memleketti odan ári damytý jolyndaǵy otandyq kásipkerliktiń rólin talqylaý búgingi is-sharanyń negizgi maqsaty ekenin atap ótti.
– Qazaqstan halqyna Joldaýymda ekonomıkalyq saıasatymyzdyń negizgi maqsaty – búkil elimizdiń ál-aýqatyn sapaly jáne ınklıýzıvti túrde jaqsartý isi ózgermeıtinin erekshe atap óttim. Bul maqsatqa erkin ári tıimdi naryqtyq ekonomıka qurý arqyly ǵana qol jetkizýge bolady. Memlekettiń ekonomıkadaǵy jetekshi róli, ásirese memlekettiń bıznes isine aralasýy kelmeske ketedi jáne solaı bolýǵa tıis. Memlekettiń mindeti – zańǵa baǵynatyn bızneske el ishinde de, halyqaralyq naryqta da qoldaý kórsetý, – dedi Memleket basshysy.
Onyń aıtýynsha, ekonomıkany monopolııadan aryltý jáne jańa naryqtar ashý jumystary jalǵasady.
– Básekelestik jaǵdaıy teńestiriledi. Endi qandaı da bir tulǵaǵa basymdyqtar berilmeıdi. Úkimettegi baılanystary men onyń tarapynan jasalatyn qamqorlyqqa qaramastan, Qazaqstanda adal bıznespen aınalysý kez kelgen adamǵa tıimdi jáne qaýipsiz bolýǵa tıis. Bul – negizgi ustanym. Biz shaǵyn jáne orta bıznesti damytamyz. Kásipkerlerdiń jańa býynyn ósirýge, jańa ıdeıalar men oı-pikirlerdi qoldaýǵa basa mán beremiz. Sonymen qatar memleket iri, qalyptasqan bıznesti qoldaýdan bas tartpaıdy. Bul týraly joǵaryda aıtyp óttim. Kerisinshe, biz, eń aldymen, sizderdi Ádiletti Qazaqstan qurýǵa belsene atsalysýǵa shaqyramyz, – dedi Memleket basshysy.
Qasym-Jomart Toqaev bıznes ókilderine osy maqsattarǵa jetý úshin birqatar sheshim qabyldanatynyn jetkizdi. Atap aıtqanda, salyq saıasaty men salyq ákimshiligi túbegeıli qaıta qaralady.
– 2024 jyly jańa Salyq kodeksi kúshine enedi. Ony ázirleýge bıznes tikeleı qatysady. Bul – meniń Úkimetke bergen tapsyrmam. 2024 jyldan «basynan bastap retteý» júıesi iske qosylady. Bul bıznesti artyq ákimshilik qysymnan bosatady. Memlekettik satyp alý tásilderi men memlekettik-jekemenshik áriptestik modeli tolyǵymen qaıta qaralyp, jer qoınaýyn paıdalaný jónindegi zańnama jetildiriledi, – dedi Qasym-Jomart Toqaev.
Prezıdent iri bıznes ókilderin qoǵamdy tolǵandyratyn áleýmettik máselelerdi sheshýde shet qalmaýǵa shaqyrdy.
– Adamı kapıtalǵa, atap aıtqanda, zamanaýı balabaqshalar, jaıly mektepter, aýrýhanalar, irgeli ýnıversıtetter salýǵa, týrızmdi damytýǵa ınvestısııa quıý da mańyzdy. Sizder qaıyrymdylyq ister jasaýdy jalǵastyra beretinderińizge senimdimiz. Qazir elimizde mektepterdiń, stýdentter jataqhanalarynyń, jastarǵa arnalǵan sport ǵımarattarynyń tapshylyǵy seziledi. Sizderdiń kómekterińiz el úshin eleýli bolar edi, – dedi Prezıdent.
Jıyn sońynda Memleket basshysy bılik pen bıznes arasyndaǵy konstrýktıvti dıalogty jalǵastyrýdyń mańyzdy ekenin atap ótti.
