Senat Tóraǵasy Joldaýda Ádiletti Qazaqstan qurýdyń joly aıqyn kórsetilgenin aıtty. Máýlen Áshimbaev muny strategııalyq baǵdarlamalyq qujat retinde qarastyrý kerek dep esepteıdi.
«Joldaýda memlekettik saıasatty transformasııalaýdyń naqty qadamdary kórsetilgen. Qazaqstandyq otbasylarǵa, balalarǵa Ulttyq qordyń resýrstarynan qosymsha kómek beriledi. Bul ulttyq tabysty barynsha ádil bólýdi kózdeıdi. Sondaı-aq sán-saltanat salyǵyn engizý týraly usynys ta áleýmettik ádilettilikti qamtamasyz etýge arnalǵan mańyzdy qadamdardyń biri. Jalpy, Joldaýda sońǵy jyldarda qoǵamdy alańdatqan kóptegen máselege jaýap berilgen», dedi Máýlen Áshimbaev.
Basylym tilshisiniń saýalyna jaýap bergen Máýlen Áshimbaev kezekten tys Prezıdent saılaýy, Májilis pen máslıhattar saılaýyna da toqtalyp, bul bılikti demonopolııasyzdandyrý úshin jasalyp jatqanyn aıtty. Senat Tóraǵasy mundaı mańyzdy qadam elimizde teńgerimdi jáne básekege qabiletti saıası júıe qurýǵa baǵyttalǵan saıası reformalardyń jalǵasy ekenin de tilge tıek etti.
Sonymen qatar sezd Hatshylyǵynyń meńgerýshisi aldaǵy din lıderleriniń forýmyna daıyndyqtyń sońǵy kezeńderi týraly baıandady. Máýlen Áshimbaevtyń aıtýynsha, shetelden kelgen delegasııalar men meımandardyń kóptigine qaramastan, uıymdastyrýshylardyń aldynda elorda turǵyndary men qonaqtary úshin kez kelgen qolaısyzdyqty barynsha azaıtý mindeti tur. Sondaı-aq Rım Papasynyń messasy úshin Qazaqstanǵa keletin azamattar men týrısterdiń is-sharaǵa erkin qatysýyna jaǵdaı jasalýda. Atap aıtqanda, logıstıkany jeńildetý úshin qatysýshylardy Messa ótetin jerge jetkizý úshin arnaıy avtobýstar uıymdastyrylady, qatysýshylardy tirkeýdiń qolaıly júıesi quryldy jáne ol qazirdiń ózinde jumys istep tur.
Kongress jumysyna Rım Papasymen qatar ıslam, hrıstıan, ıýdaızm, býddızm, ındýızm, daosızm, sıntoızm jáne basqa da álemdik dinderdiń kóshbasshylary men ókilderi qatysady. Sezge musylman áleminiń kórnekti rýhanı kóshbasshysy – Ál-Azhardyń Joǵarǵy ımamy sheıh Ahmed at-Taıeb, Izraıldiń bas ravvınderi jáne basqa da din qaıratkerleri keledi. Alaıda Sezd Hatshylyǵynyń meńgerýshisi bul forýmdy tek dinı is-shara retinde qarastyrmaý kerek ekenin atap ótti.
«Rýhanı kóshbasshylar halyqaralyq uıymdardyń ókilderimen, saıasatkerlermen birlesip álemdegi búgingi syn-qaterlerge qarsy áreket etý joldaryn izdeıdi. Sondyqtan Álemdik jáne dástúrli dinder lıderleriniń sezi – elder men halyqtar arasyndaǵy dinaralyq, órkenıetaralyq dıalogty damytý tásilderi talqylanatyn alań», dedi Máýlen Áshimbaev.
