Qazaqstan teleradıokorporasııasynyń ujymymen kezdesý barysynda mınıstr korporasııanyń stýdentterge arnalǵan medıamektebin akademııa dárejesine kóterýdi usyndy.
Esterińizde bolsa, otandyq aqparat keńistiginde teleradıoarnalar janynan qurylǵan tuńǵysh respýblıkalyq medıamektep jumysyn ótken jyly bastaǵan bolatyn. Medıamektepten jeti aı merzim aralyǵynda JOO jýrnalıstıka, kıno jáne televızııa, rejıssýra fakýltetiniń 30 stýdenti aqysyz negizde tájirıbelik bilim alyp shyqty. Nátıjesinde, 9-y korporasııa qurylymdaryna qyzmetke alyndy.
Mınıstr bolashaqta medıamektepti akademııa dárejesine kóterip, tek stýdentter emes, aımaqtyq kadrlardyń biliktiligin arttyrý ortalyǵyna aınaldyrý týraly usynys bildirdi. «Bul úshin praktıkalyq bilim beretin mamandardyń biliktiligi men korporasııanyń tehnıkalyq áleýeti joǵary», dedi mınıstr.
Basqarma tóraıymy Lázzat Tanysbaı 2022 jylǵy qarasha aıynan bastap medıamektep jumysyn jańasha baǵytta qaıta jalǵastyratynyn aıtty.
Sonymen qatar mınıstr «Habar 24» arnasynyń on jyldyq mereıtoıy jáne «Habar» agenttiginiń jańa telemaýsymynyń tusaýkeserine qatysyp, Memleket basshysy men Premer-Mınıstrdiń arnaıy quttyqtaýyn jetkizdi. Elimizdegi basty aqparat arnasynda on jyldan beri úzdiksiz qyzmet atqaryp kele jatqan birneshe jýrnalıske mınıstrliktiń marapattaryn tapsyryp, televızııa salasynyń damýyna zor úles qosyp kele jatqan ujymǵa tabys tiledi.
