Petropavlda «Qyzyljar» Shymkenttiń «Ordabasysyn» 4:0 esebimen oısyrata utty. 12-mınýtta Maksım Chıkanchı alǵashqy goldy soqsa, úzilisten keıin de alań ıeleri qarqyndaryn báseńdetken joq. Nátıjesinde, Mýssa Kone, Valerıı Karshakevıch jáne Elgýdja Lobjanıdze nysanany dál kózdedi. Osy jeńistiń arqasynda upaı sanyn 21-ge jetkizgen Soltústik Qazaqstan oblysynyń ókilderi jarys kestesinde 11-orynǵa kóterildi. Ońtústik óńiriniń oıynshylary 7-satyǵa jaıǵasty.
Túrkistanda ótken básekede «Qaırat» «Turandy» 3:1 esebimen tize búktirdi. Bul oıynda almatylyqtardyń sapyndaǵy brazılııalyq legıoner Joao Paýlo het-trık jasady. Ol qarsylastarynyń qaqpasyn 33, 41 jáne 60- mınýttarda dál kózdedi. Alań ıeleri arasynan Oljas Kerimjanov 78-mınýtta gol soqty. Osy kezdesýden keıin 30 upaıdy qorjynǵa salǵan «Qaırat» bir satyǵa joǵarylap, 5-orynǵa kóterildi.
