BEIRESMI KEZDESÝLERDEN – RESMI KELISSО́ZDERGE

Keshe elordada Eýropadaǵy qaýipsizdik jáne yntymaqtastyq uıy­my­nyń Is basyndaǵy tóraǵasy, Qazaqstan Respýblıkasynyń Memlekettik hat­shysy – Syrtqy ister mınıstri Qanat Saýdabaevtyń bastamasymen Prıdnestrovedegi jaǵdaıdy retteý jónindegi “5+2” pishininde (taraptar – Moldova, Prıdnestrove, araaǵaıyndyq tanytýshylar – EQYU, Reseı, Ýkraına, baıqaýshylar –  Eýropalyq Odaq, AQSh) kezdesý ótti. Aldyn ala atap óteıik,  bul kez­de­sýdi Qazaqstannyń astanasy – Astana qalasynda ótkizý týraly ke­lisimge osy jyldyń 1 sáýirinde EQYU-nyń Is basyndaǵy tóraǵasy Qanat Saýdabaevtyń Kıshınev jáne Tıraspol qalalaryna ja­sa­ǵan sapary kezinde qol jetkizilgen bolatyn. Sonymen qatar, Qazaq­stan Respýblıkasynyń Prezıdenti Nursultan Nazarbaev uzaqqa so­zy­lyp bara jatqan kıkiljińderdi, onyń ishinde Prıdnestrovedegi jaǵdaı da bar, kelispeýshilikterdi beıbit jolmen retteý Qazaq­stan­nyń EQYU-ǵa tóraǵalyǵyndaǵy ma­ńyzdy basymdyqtardyń biri bo­lyp tabylatyndyǵyn atap kór­setken edi. Biz Prıdnestrove problema­syn únqatysýǵa qatysýshy tarap­tar­dyń barlyǵynyń múddelerin eskere otyryp, ony tek beıbit jáne saıası jolmen ǵana naqty retteýge bel býǵanbyz, dedi Qanat Saýdabaev kezdesýdi ashardaǵy só­zinde. Qazaqstan úshin Prıdnes­tro­vege qatysty mártebeni qam­tamasyz etý Moldovanyń egemendigi men aýmaqtyq tutastyǵyn saqtaý, sondaı-aq óńirdegi turǵyndardyń saıası-ekonomıkalyq jáne gýmanı­tar­lyq quqyqtaryn qurmetteý formýlalaryn retteýden turady. Kezdesýde Prıdnestrovege qa­tysty problemalardy retteýde sál de bolsa alǵa basýshylyq bar ekeni de atap ótildi. Mysaly, Kıshınev pen Tıraspol arasynda birqatar máselelerdi sheshýde ilgerileýshilik baıqalady. Prıdnestrove problemalaryn retteýge baılanysty kelissózder 2006 jyldan beri beıresmı turǵyda júr­gizilip keledi. Al “5+2” pishini­niń tolyq ataýy – Prıdnestrove­ni retteý jónindegi kelissózder úderisi aıasyndaǵy saıası másele­ler­diń turaqty keńesi degen uǵymdy bildiredi. 2006 jyldan saıası retteý máseleleri format aıasynda talqy­lanbaǵandyqtan, “5+2” kezdesýi sol kezden bastap beıresmı mánge ıe bolǵan edi. Osyǵan baılanysty Qanat Saýdabaev kezdesýde “Biz beı­resmı kezdesýlerden resmı ke­lis­sózderge kóshý kerek dep oılaı­myz”, dedi. EQYU-nyń Is basyndaǵy tór­aǵasy, sondaı-aq Prıdnestrove problemasyn retteýge qatysty Reseı men Ýkraına prezıdent­te­riniń málimdemelerin oń baǵalaı­tynyn jetkizdi. “Aımaqtaǵy jaǵ­daıdy retteý joldaryn izdestirýdiń bolashaǵyn qıyndatyp jibermes úshin, – dedi ári qaraı Qanat Saý­dabaev, – Moldova men Prı­dnes­trovege birjaqty is-áreketterden aýlaq bolýǵa qatysty shaqyrýlardy biz de qoldaımyz”. Álısultan QULANBAI.