Keńes tóraǵasy, Parlament Májilisiniń depýtaty Amanjol Áltaı otyrystyń basty maqsaty elimizde qolǵa alǵan reformalardyń mán-maǵynasyn, Joldaýdyń basym baǵyttaryn qoǵamǵa jetkizip, halyqty uıystyrý, alǵa qoıǵan mindetterdi júzege asyrýǵa qoǵammen birlesip yqpal etý ekenin jetkizdi.
«Memleket basshysynyń Qazaqstan halqyna Joldaýynyń aýqymy keń, mazmuny erekshe. Joldaýda kóterilgen baıypty bastamalar qordalanǵan máselelerdiń sheshý joldaryn aıqyndap, memleketti odan ári jańǵyrtý isine jańa mindetter qoıyp, turǵyndardyń ál-aýqatyn arttyrýǵa serpin beredi. «Ádiletti memleket. Birtutas ult. Berekeli qoǵam» – amanatqa adal, eńseli el bolý jolyndaǵy aıqyn maqsat. Jańa ekonomıkalyq saıasat, naqty sektordy damytý, el bolashaǵyna arnalǵan strategııalyq ınvestısııa, memlekettik basqarý isin qaıta jańǵyrtý, zań jáne tártip ústemdigi – Memleket basshysy usynǵan Joldaýdyń mańyzdy baǵdarlary. «Kúshti Prezıdent – yqpaldy Parlament – esep beretin Úkimet» formýlasy negizinde Prezıdent qolǵa alǵan reformalardy iske asyrý – ortaq maqsatymyz. Ol úshin ulttyq tutastyq, ortaq maqsat jolynda birigý, ádilettilik, jańashyldyq pen tabandylyq, bilim men biliktilik, memlekettik minez qajet», dedi Amanjol Áltaı.
О́z kezeginde, Parlament Májilisiniń depýtaty Darhan Myńbaı Prezıdent Joldaýynda aıtylǵan máselelerdi halyqqa jetkizý – basty maqsat ekenin jetkizdi. Mańyzdy qujattaǵy oılardy ortaǵa salyp, ony júzege asyrý máselesine mán berý qajet ekenin atap ótti.
«Búgingi memlekettik basqarý isin jańǵyrtý jumysy eń aldymen jańa ekonomıkalyq saıasatqa qatysty bolmaq. Sebebi kez kelgen istiń ar jaǵynda qarjy kózi bolmasa, bastamanyń barlyǵy qur jalań sózge aınalady. Sondyqtan Prezıdenttiń «Azamat-bıznes-memleket» arasyndaǵy qatynasty túbegeıli ózgertemiz degen sózi kóptiń kóńilinen shyǵyp otyr», dedi depýtat.
Al Senat depýtaty Dınara Nóketaeva Joldaýda aıtylǵan Ulttyq qordyń jyl saıynǵy ınvestısııalyq tabysynyń bir bóligin balalarǵa aýdarý máselesine toqtaldy. «Qazaqstanda jyl saıyn 420 myńǵa jýyq bala dúnıege keledi. Bul rette «Ulttyq qor – balalarǵa» baǵdarlamasy Ádiletti Qazaqstan qurý jolyndaǵy asa mańyzdy bastama bolyp otyr. Bul – el erteńine negizdelgen strategııalyq ınvestısııa, urpaq qamyn oılaǵan utymdy baǵdarlama», dedi senator.
Májilis depýtaty Janarbek Áshimjan Joldaýda kórinis tapqan mańyzdy máseleniń biri – ıgerilmeı jatqan jerdi memleket menshigine qaıtarý jumysy jaıly aıtty. «Joldaýda Memleket basshysy jyl sońyna deıin aýyl sharýashylyǵy maqsatyndaǵy 5 mln gektar jerdi qaıtarý josparlanyp otyrǵanyn jetkizdi. Bul ıgi iste partııa janyndaǵy «Jer amanaty» komıssııasynyń úlesi ushan-teńiz. Atalǵan komıssııa Memleket basshysynyń pármenimen qurylǵan bolatyn. Búginde Ádilettilikti qalpyna keltirý maqsatynda bir kezderi zańsyz jeke menshikke ótip ketken jerlerdi memleket menshigine qaıtarý jumysy qarqyndy júrip jatyr. Qazir qoǵamda jaıylym, shabyndyq máselesi óte ózekti. Sondyqtan Prezıdent Joldaýyndaǵy jer máselesiniń mańyzy zor», dedi J.Áshimjan.
Parlament Májilisiniń depýtaty Aıdos Sarym elimizge jańa saıası ózgerister aýadaı qajet ekenin alǵa tartty. Onyń aıtýynsha, mundaı ózgeristerge bel býmaıynsha Ádiletti Qazaqstandy qurý, jarqyn bolashaqqa umtylý, jańa saıası dáýirge qadam basý múmkin emes.
Nur-Sultan qalasy túrik etnomádenı ortalyǵynyń tóraǵasy Ásker Pırıev keńes músheleriniń nazaryn Joldaýda aıtylǵan kásipkerlikti damytý men ınvestısııa máselesine aýdardy. «Memleket basshysy Joldaýda kásipkerlikti júıeli túrde qoldaý máselesine erekshe toqtaldy. Tipti zańnamalyq qujat pen nusqaýlyqty qaıta-qaıta túzete berýdiń ornyna yqsham ári túsinikti jańa erejelerdi bekitken jón dep sanap, bul tásildi 2024 jyldan bastap engizý qajet ekenin jetkizdi. Prezıdenttiń bul usynysyn tolyq qoldaımyn. Ekonomıkanyń lokomotıvi – shaǵyn jáne orta bıznes. Sondyqtan memleket kásipkerlerge kedergi keltirmeı, kerisinshe qoldaý kórsetýge tıis. Memleket kásipkerlerdiń jumysyn tekserý emes, baqylap otyrýy qajet», dedi Á.Pırıev.
M.S.Nárikbaev atyndaǵy KAZGIýÝ ýnıversıtetiniń basqarma tóraǵasynyń orynbasary Aınur Kárbozova Joldaýdaǵy bilim salasyna qatysty aıtylǵan oılardyń mańyzdylyǵyna mán berdi. «О́kinishke qaraı, qazirgi tańda elimizdegi mektep oqýshylarynyń 80 paıyzdan astamy bolashaq mamandyqty qalaı tańdaý kerek ekenin bilmeıdi. Kásibı baǵdar almaǵan. Bul rette Prezıdent bıylǵy Joldaýynda joǵary bilim salasyna qatysty birneshe mańyzdy bastama kóterdi. Sonyń ishinde, ınjenerlik-tehnıkalyq mamandar daıyndyǵyn kúsheıtý, joǵary oqý oryndaryndaǵy bilim sapasyn jaqsartý, granttar sanyn kóbeıtý, jastardyń jaǵdaıyn jaqsartý máselelerine erekshe nazar aýdaryldy. Bul bastamalar – jastar qaýymy úshin asa mańyzdy», dedi Aınur Kárbozova.
Sondaı-aq otyrys barysynda keńestiń turaqty múshelerimen qatar, arnaıy shaqyrylǵan qonaqtar da sóz sóıledi. Oramdy oılaryn ortaǵa saldy. «Barlyq pikir bildirgen azamattarǵa alǵys aıtamyn. Rasynda, Joldaýdyń basym baǵyttary ultty uıystyryp, ál-aýqatyn arttyryp, birligin bekem etedi dep senemin», dep túıindedi Amanjol Áltaı.
